1 Hereu ga keceu gade kedi kecang rehi gade gwang ngkwalu,

namdibe reugwamedung!*

Anuide gwa lüt kera mtei pwa bam dida!

Ma tie ge le Israel gwangpei de

pe bia gage dap.*

2 Dede nang, Bethlehem Ephrathah,

nnui Judah leuhme kakgade ceutu lie de,

nnui dade mige a da gwang zie

Israel de teu kera,

pe ndeube ndaa gade la dida,

kelungta gade.*

3 Ciziemne RAMPAUBE penui de püt dizie,

henatet teei kela pui de henana ge de mna kemaktane,

nah Israelmena langgi kedimedung cailigwang dai luzie.

4 Pa sap delwe

RAMPAUBE kengkieng teu eh, pe meurün maa pie luzie,

RAMPAUBE pe Tinggwang kengkieng zi gade.

Penui lungh bam zie,

Cika de pane di zie kideu penli kecang.

5 Cine aide le kezuyi dizie,

Assyria reugwamaa anui deu ga kegwang dau,

nah anui namdung gwa kelüt dau,

cidau anui penuide kekwame hang hena

nah mina muiteume hang heset de ngngwa eh penuide renia cuh zie.

6 Kiengtie le penui Assyria deu gwa luzie,

nah Nimrodme deu* penui rieki gade.

Pa anuide Assyriamedung dade kelilu zie,

penui anui deu ga kelüt dau

anui raidung ga penui tet kelüt dau.

7 Jacob leuh bang kenzeu de minadung kekiee ge kakga bam zie,

RAMPAUBE dade hezim nzwa,

cehei reu ga tingruidung nzwa,

cide mina de kwa la ma,

nah penui mina nadung de kwa lama.

8 Jacob leuhme bang kenzeu heleuhdung kakga la zie

minadung kekiee ge kakga,

hingho ge hegung ga makaunedung kakga kebam nzwa,

hingho ge meurün hau kakga kebam nzwa

pa penui da kahgwang kecu dau,

pa penui reu ga tet nah penuide teurak takcai di;

nah cika migede penuide keli beu kera gah dizie.

9 Nnui ngauraumedung de renia eh nnui ba hwa cuh gai zie,

nah cide ne penuide ngkap dizie.

10 "Cipau benai cide tei dizie", aide RAMPAUBE ne ndugai,

"Ih nnui kakgade nnui hekwendung ngkap dizie

nah nnui hekwen bagidung tei msia dizie.

11 Ih nnui deu ga kebam namdidung de ngkap dizie

nah nnui riekelu namdi pelane teingkau dizie.

12 Ih nnui ba kebam rekatadung de ngkap dizie,

nah nnui rekamedung ge de bam si lak ta.

13 Ih nnui mamiedung ngkap dizie

nah nnui kakgade nnui tsusumdung ngkap dizie.

Nnui ba le tei kelu mamiedung de reca si lak ta.

14 Ih Asherah rabepui miedung de nnui kakgade pai mpet dizie,

nah Ih nnui namdidung ngkap dizie.

15 Rata nah lunghop de le Ih a sam kingnei kemak

leuhdung da hekum peei zie."