1 Nineveh ha ndu kegai. Elkosh nam gade kegwang Nahum dage marengei keu kelia laisiukwak.

2 RAMPAUBE au lungriak nah hekum kepeei Tinggwang.

RAMPAUBE au ratakesia teu hekum peei la nah pe ngauraume da pe rata bammui la la.

3 RAMPAUBE au pe rata zette lama, nah pe kengkieng au disüt; Pa madaude kemaume de saja peu mene tadi lama,

RAMPAUBE tet kemie ga rahang kaigui guinri nah hemwadung au pe pi le tei ngka kegai rebui da.

4 Pa jaaidi de kesiu gaila nah cide tei cangh dila; pa hereukidung pelane tei cangh dila.

Bashan ki dila, nah Carmel lamlwatu lie de; Lebanon mapadung ki dila.

5 Tinggwang dwa gade lamlwatudung nlai dila, nah kideutudung sui dila;

kideu mbeu dila, nah pe minadung ngkap dila.

6 Pe lunghop dwaga caune sap lulai? Cau pe lunghop de mbai lulai?

Pa perata miheu nzwa ruigai la, pe dwa gade tsuradung pangpop dila.✝

7 Rampaube au yi, keherei tingdau minadung de gum beula; nah pa peda nreu kegwangme ma piela.

8 Dede pa duidiet cisüt kecu nzwa pe ngauraume de ngkapzing dila; pa penuide kemui gage kai dila.

9 Nnui RAMPAUBE de mmau eh daipai ciem pei lano?

Pa nnuide ngkap dizie, keherei pia pe kenabe cuh silak.

10 Pe ngauraume hetu kerepi pwa kebam bedung nzwa dizie; nah penui penui zau le sak mie kelame nzwa dizie;

penuide reigau ki kedi be nzwa ru dizie.

11 Nineveh nda de mige kenliem ciemle puiting eh petlu, pa RAMPAUBE de mmau eh heciem riem, pa makesia teu ncuh beu kelame ge.

12 RAMPAUBE pe minadung Israelme dage ranggai kecu, "Penui ngkieng nah kieesüt lie de, iciu liede penuide ngkap dizie;

nah penui Assyriame gah dizie. Ih nnuide teikeherei di liede, dede Ih nnuide tei keherei dai si lakta.

13 Assyriame kengking de Ih cu penui ngwanggai de nnui dade lwak dizie da, nah nnuide kangpwa kebam riadungde teicak dizie da."

14 N ziemne RAMPAUBE aja ge kaibeu, Nineveh:

"Penui zi teu ndwa la kera penui leuh lunglak,

Ih penui rabedung mie kerecakidung ga kebamdung de ngkap dizie.

Ih penui ziemne herau kui luzie, penui ringla lu dui kedi ne."

15 Pielo, samlia keyi teu eh lamlwatudung reuga gwang la, Pa ngngwakeyi reci gaibeu!

O Judah, nnui hengyidung hengyi lu delwe nnui sampet de kai zeulu,

kedanemene kenlienme madau de nnui deu gwalüt dailak ta; penuide ngkapzing dida. *