1 Co, Nineveh namdi ga hejai pui kebam!

Cika kenret nah kerega nia le puiting bam; Cika kesia ketei mtak lama.

2 Dede cu au heria kehebiet kwadung nah garitadung kwa,

hekwen kepak kwa, bagidung ketet kwa.

3 Hekwen keteume regi kera pakpet,

kingtiedung kelik kecu, hengeidung mzai kecu,

kekiee ge de teitsetti da, ketsai pau keswa hu lu da.

Ketsaipau pei kap kai kelak bam; penuide gwang ketang cume ketsaipau reu ga kaumie.

4 Aide tei kebam de au hezukeyi helipuidung, cidungde kehemeu tah ketei ga kedibe pui, penuide teu helila ketei kekiee ge bam kedine,

pa heleuhdung de pe helipui ta le zwa dila, nah minadung de pe kehemeu ta le.

5 "Pielo, Ih ncu mmau la, aide reugwame reu RAMPAUBE ne ndugai, Ih ncu gau paula dizie

nah peu heleuhdung de nang paula bam kecu peu ngau zie, hegwangram pelane ga n ngngam ngau zie.

6 Ih n dage kehera kemneeu bedung le pwa beu gai zie nah peu ncu nneu zie; Ih peu minadung de ncu pie zie.

7 Ncu kengau leu ne caisim dizie, penui rang eh

‘Nineveh ngkap dida; cau pe ziemne hei eh hap lai no?’

Cau pecu kemak neu la no?"

8 Nang Nile reuki ga tei pwa kebam Thebes namdi swa yiki ni, petaiga dui twagwa kebam,

jaaidi de pe kekwabe, pe kirie au jaaidi deda?

9 Cush nah Egypt au pe kengkieng, nah pe kengkieng penli gah;

Put nah Libya namdi pe zangnabe da.

10 Dede Thebes de pung tetti; pecu tuilu;

puidiki leune ga pe name de daptsetti;

pe ngauraume pe mipeidung de luu kera dacak tei,

nah pe mipei kengkieng leu de hegeuria le kangdi.

11 Nineveh nang de zausakme ge tei zie; nang mbai kera tei zie,

nah nang n ngauraume dade mbai lu kera tei cu zieda.

12 Nnui reneidung nzüttsi meu keraibe nzütbangdung nzwa zie:

pebang kecui gai de petsi nnui mui ga cak lüt gapte zie.

13 Pielo, nnui kakga minadung au mnei;

ngauraume ziemne ndeu kiriedung ngkei nzaha pwa bam,

mapakdung de mi ne ru dizie.

14 Mie delwe gwaketang kera ziemne dui pwa lwe mteilu; nah nnui kudadung tei ntiplu;

tangdeitsu tei kera lidei keniaklu;

delwe tangdeitsudung teilu.

15 Mi ne nuide ru dizie, nah kiengtie ne nnuide dang di zie. Tangriem ne maleune tyei ngga di kela nzwa nnuide tyei ngga dizie.

Bwa kela tangriemdung nzwa nah tangriem maadi nlai kela maa nzwa nnui katei nnuide tei nkiee lu.

16 Nnui heliketeime tinggimdung ga hegidung swa de kiee eh tei luda; dede penui au tangriemdung nzwa: penui hesiu mzang mpet la nah pecai lim tet dila.

17 Nnui hegwangmedung au tangriemdung nzwa da, nah reugwame kedidung au tangriem hau nzwa da

tingkengkung benai tangdeu ga taubam dila.

Dede tingnaimiak pet ge penui lim tet dila nah migede penui dai ga mie di bi ci lama.

18 Assyria gwangpei, n meurün kekwamedung zip dida; ngu mina keyi medung zeu mtak dida.

N minadung de hangdeutudung gage teizang dida nah penuide migede kilung ga ngngwa gwang dai kera gahdi.

19 N rezamdung de tei mmi gai lak ta. N rezamdung de teeisüt dida.

Keheibe de ngkap kedi n ha kesiu leune penui suiyi eh nreu gage bapeu gai zie.

Kedanemene penli kegah n bata kesiadung de cau dage gwang meno tadi no?