1 Caihakecibe Habakkuk sam ngaukelu,

2 "RAMPAUBO, Ih daitie ge kengha ziemne mra laino, nah nang kingnei lak no?

Ih n dage mra gai, ‘Zaisiet!’ dede nang ngha beulak.

3 Nang daitei acu peu samsangkemak zai cikenzwa ngau nah bata kesia peu pie bamla no?

Kekap nah zaisiet a dwaga bam; nah luga aika keregi, nah kesamlim kecu cuhdi.

4 Cine hezaibe mnei di zeu, nah madaude kemzuibe teibeu meda,

Kedanemene kemaume ne kemzuime de twagwapung bam; cine kemzuibe de au kebai gi dida."

5 "Heleuhdung de piegai nah penuide mcet bamlu; nnui swagah süt lu!

Ih nnui tingdau mage nnui nlum gailak zing kecu ge teigai bi lai eh bam nnuide peu cide cigwang kecudau.✝

6 Cine pielo! Ih Chaldeame de teucuh lai eh bam, cipau zaisiet nah mtakla kemak leuh de,

penui gu kemak hangdeu gumlu kerane penui kideube ga tetpet la dida.✝

7 Penui au ngaukehing nah kengngi ge; penuikatei penui suibe teila.

8 Penui hekwendung de kaudaunadung swade mzetki, tinghegi heneudung swade mzetki.

Cine penui hekwendung piceu,

nah penui gu hekwen keteume mdei süt kecu gade gwa gwangla, penui lingrie nzwa eh matyei kera kelwa lim gwang.

9 Penui pelane regi kerane gwangla;

penui maakiee au heciang deu tingkai nzwa eh tet, nah penui hebaangme heciangdung nzwa hekwa zie.

10 Cine penui hegwangpeidung de henui teila, nah kedimedung au penui ziemne henui ge gwale ma.

Penui kuda bamdung de de nuineu la, kedanemene penui hangdeu hekwa cuh lula nah cide keu lula.

11 Pecai tingkai gui kelwa gwang zie; cide guikah tet dizie, penui au kemaume, penui kengkieng au penui tinggwang da."

12 "Nang ndaa gwang kedi ting gade meni, RAMPAUBE a Tinggwang, a Kemcibe? Anui au tsai dilak.

RAMPAUBE penuide tutiak kera ziemne nlum gaibeu, nah nang, Tangtsube, penui de teimzuilu kerane teicuh luda.

13 Kemau ga piegai kera n miak au mci hamdi, nah nang mina kemau ketei ngau kebam de n lungning ma;

nang daitei mina peciem ketei kemau aidungde de lialu lai no?

Nang daitei eh kemaume penui swa masangki kecume de ngkap kebam dau mlei mene bamdi zeu no?

14 Nang mina de jaaidi ga heka nzwa teigai, kaucietnadung penui reuga kedibe kega nzwa.

15 Pa minadung de kagwak le heka ketui nzwa tui;

pegu helang ga minadung de teukerei tet;

pegu teu kehekwa rak gade penuide teu hekwalu;

cine pa herwa nah pe suiyi bam.

16 Cine pa pegu langdung de reca eh keru ratak teibeu la

nah pegu kehekwa rak de de marim kehengui rugai beula,

cine pa pegu helang ziemne lungh kehega bam,

nah pe taktyei de tyei yitube.

17 Cine pa pegu helang tei mta bam zieni,

nah pa pe ngaugia teu mene heleuhbedung de teingkap eh bam zieni?"