1 Caihakecibe Habakkuk gu kekie. Shigionoth gade:*

2 RAMPAUBO, nang tei kegai de Ih siuda, nah Ih ngngi bam.

RAMPAUBO, n tatei kegaide cu anui tingdau teigai dailo; cu tingdau ga peu cilu kerane;

n ratadi liede ngaunggia lu kera nsunggai lo.

3 Tinggwang au Teman gade gwang, nah Kemci Tinggwang au Paran deutu gade gwang.Selah

Pe kendu le tinggimdung gumpung bam, nah kideube ga pe hetwa le puibam*.

4 Kebaa nzwa baaha ge, pe ba gade kebaa ria kena baaha ge bam;

nah cika pa pe kengkieng kebai pwabam.

5 Mateei kesia pedwa mie raidi,

nah rapia de pe caisui la.

6 Pa mtaklu nah kideube de mdet gai; pa piegai nah heleuhdung de kecui gai.

Kelungta kela lamlwatudung de tei zangra di, nah bammui kela hangdeutudung hena miedi.

Pe lampui au bammui kelabe.

7 Cushme paikidung gade keherei kebam, nah paiki kelim pai Midiame deu ga kebam mbeu bam kecu Ih ngau.

8 RAMPAUBE hereukidung de pe rata bam ni? Hereukidung dage n lunghop bam ni,

mede jaaidi de n rata bam no,

nang n hekwendung nah ngkieng kelu n bagidung reuga tet keladau?

9 Nang n lakpi teu kera mteilu; nang n lakpitsidung n lakpi gage kailu! Selah

Nang kideube de hereukidung le mzi lu.

10 Lamlwatudung ncu ngaulu eh mbeudi.

Dui penui reu ga rui mie; jaaidi kecok mra gai.

Cide pe nswakdung cehu cuhdi.

11 Tingnaimiak nah hekei penai bam hutu gade mlai mene sapdi,

n lakpitsidung lim kela gade pe baa ngau kegaine,

nah n ngei tingkepik nzwa kepik kegaine.

12 Nang n rata eh kideu tetkah gwang. N lunghop gade nang heleuhdung de dapgai.

13 Nang n minadung de kelilu kerane tetpet, nangne keniak kelube de kelilu kerane.

Nang kenlienme kilung ga muiteube de kekei miedi nah pe caisuime de ngkap zingdi. Selah

14 Nang pe reugwame peu bungdi penui lakpitsidung le kedanemene cide anui de teizang di kera rahang nzwa kegwang ne,

kegahme de ngkim eh tei keherei bam kelame nzwa penui ngkau eh.

15 Nang n kwendung teu eh jaaidi reu tet, nah dui kengkieng de tei mdi dida.

16 Ih siuda, nah a lung gade mbeudi! A muileukung ngngi di pekwa de siu gai ge.

Kemnei a radung ga gwangdi nah a lung gade Ih mbeudi,

anuide gwaketang kecume de saja peu kera Ih zingde eh peting gwang kera kwa kebamdau.

17 Nzütbangdung petsi ga liede

nah kubebang ga petsi bui melie de;

nah olive bang buipet kecude yilu melie de,

nah luhdung mei bui petlu melie de,

nah kauhaudung tsaidi liede

nah hetum kidung mta dide, Ih aide tei zie.

18 Iciude, Ih RAMPAUBE da a suila zie.

Ih a suiyi zie kedanemene RAMPAUBE au a kelikelube lu.

19 RAMPAUBE Tinggwang au a kengkingbe

nah pa a pi heti pi nzwa teibeu.

Pa acu heni kecehudung ga teuswa beu.

Lei pie kerengeibe da, a leiria bungdung gade.