1 Ih a kekwabam ga saplu nah reketbam ga akatei kwa bam zie,

nah RAMPAUBE a dage dai ranggai zie bi Ih kwa teune eh piebam zie

nah Ih dainzwa a ncam gade nreulu zie bi.

2 RAMPAUBE a sam keli eh ranggai,

"Marengei aide raupwa bamlu, nah lidei kwak gage rau mcigi lu iciu eh cide piage peigai de peilu kerane.

3 Kedanemene marengei cide au gwangdai kera tingdau ziemne nah cide rangbeu bi zie nah tei mene ta lak.

Cide gwang ri liede, kwa bamlu. Cide gwang bi zie nah cide gwang ridi lak.

4 Pielo! Kemau tei neu kelame au pe da keyi gah eh pe zaidi dila. Dede samsang kelame au pe kenlum gade lunghla.

5 Zau au pezai kesia rehangpei gede peu samzai tei kelakne kecwa ge,

dede herau ge nzwa pe kehengim di nah ketsai nzwa mnunglu lama.

Pekatei pe ziemne pa heleuhdung de teu hekwa nah pekatei pe ziemne minadung pelane de peu ngkwalu.

6 Ma aidungde teu eh pecu rangmsia dilak ni nah pecu henui lei tei eh aide rang zie,

‘Co pegu kemakbe tei ngkiee kebambe de nang au tei lubui da! Nang daitiege nnui pau pung kelame teu eh peulo eh hei reureu bam laino?’

7 Nnui pau pung kelame cimezing eh cuhdai lak ni, nah nang hing kelade mrak gwangdai lak ni?

nnui penui ziemne mbeu dizie.

8 Nnui mina heleuh kekiee gede tui kedine, penui ring kebamme pelane nnuide tuilu zie.

Nnui mide daptset kedine nah hangdeu, namdidung dage nah lungh kebam peciakne dage nnui zai kesia ziemne.

9 ‘Co, cauge pe ki ziemne peciem kesia ge teigai bi nnui au tei lubui da,

iciu eh pa herakesiabe dade kelilu kerane pe ciep tei hu gai.’

10 Mina kekieege de teitset kedine nnui nnui kilungme dage hengam teugwang beu da, nah nnuikatei nnui dage kemau teigai luda.

11 Tangtsudung kirie gade hap pet dizie, nah hejadung ne penui sam keli zie,

12 ‘Co kemau reu gage namdi tumlu nah cide mide daptset eh teilu.’

13 Keda leuhdung kemta bata tei eh mnei dida

nah penui teikelu leune miheu mmi dida, aide reugwame reu RAMPAUBE dade meni?

14 Dede kideube au RAMPAUBE kendu maci le jaaidi ga dui pui kebam nzwa pui dizie.

15 ‘Co cau pe kidame de sak kera ketang labi,

nang n rata keulia gai nah penuide peu sakmie

ciu eh penui paula kebam de pie kerane.’

16 Kendu be meliene hengam le nnui da pui di zie.

Cu nnui nlia da! Saklu nah nnui nnui geu rumkemak de peu ngau dizie!

RAMPAUBE ba zetle kebam piak de n da gwang lada,

nah hengam le n kendu hezuipung dizie.

17 Nnui Lebanon dage nnui zaisia kegai de nnui de nzu dizie nah makaunedung ma tei kemsia de le nnuide keheu zieda.

Kedanemene nnui mina jai teilwa kegai ziemne nah hangdeu, namdidung, nah cika lungh kebamdung de da nnui zaisia gai.

18 Heri kelu mamie aide n ziemne pe kemmi dai bam no? Kedanemene cida au mina teikelu ge, hegeu tei lwa kelu gade teigai kecu, cide au kenret keledeu ge;

cine pa mlei kemak herabedung de tei kegai ga pe kenlum kebamne.*

19 ‘Co tsingkang gede mraklu de kegai nnui au tei lubui da! Mede mlei kemak tangtsu kangge dage cuhlu de kegaibe!’ Ma aidungde magede ledeu lubui ni?

Pielo, cide rangkanggeu nah kecak le puipung, dede peda keringria gah zing*.

20 Dede RAMPAUBE au pe kemci kerecaki ga bam! Kideube pelane pe dwa gade zing de dilu."