1 Caihakecibe Obadiah marengei kengau: Edom namdi ziemne a RAMPAUBE Tinggwang ranggai.

Anui RAMPAUBE dade sam ge siu da, nah heleuhdung kakga ge samgwabe ge de langgai dida:

Cuh lu! Nah pecu regi kerane anui cuh lugo!

2 Ainie, Ih ncu heleuhdung kakga de tei nceudi zie da,

ncu au ngaungkau süt dida.

3 N mlung hegie dene ncu cwa dida: tsurakang mbai bam ga kebambe, pe bam gade hegie bam;

pa pe mlung gade rang eh, "Cauge acu kideu ga ngngwa hung lulai?"

4 Magade nang nkatei ncu helie nzwa teihu teu bamcai,

magade nciep hegidung kakga bam liede,

cika de Ih ncu ngngwa hung dizie: RAMPAUBE ne ndukegai ge.

5 Magade keregame n da gwang,

nah tingmui dau marega teudi (nang dainzwa ngkapdi bi!), penui penui ziemne kekieege rega lak ni?

Magade kubetsi-dangkecume n da gwang, penui cidungde rum teu ciak dilak ni?

6 Edomme, Esau leuhme gu dainzwa rega teu dibi,

pe mabamdung kebai pwakebam de peei mpetlu!

7 N samkak minadung pelane ncu kemdei hangdeurai dei ge gage lang bam dida.

Ngu kezuyi minadung ncu cwa bam nah ncu renia reureu bam dida.

Penui ncu ngngwa taktyei kecume n dage baih teugai zie. Pe da kecikecet bam ma.

8 (RAMPAUBE ndukegai ge) Ih cipau benai

Edom ga kemriakme de ngkapdi,

nah penui kecikecet pelane Esau lamlwatu gade tei nggah di lakni?

9 Nah n kengkieng minadung ngngi dizie, O Teman,

ciu eh dapketsetme ne Esau lamlwa gade mipei ge de teitset dizie.

10 N sinabe Jacob de renia eh regi kecu ziemne, hengam ne ncu sung dizie,

nah kelungta ziemne ncu teitset dizie.

11 Nnui ketsapreu eh sap kecu benai,

cipaunai sangmedung pe mahei tuiteu di,

nah sangmedung pe kiriedung ga nlüt nah Jerusalem ga mzi beudi,

nang de penui nzwa hangge da.

12 Dede cipaunai nang n siname rei de nuidi kerabe ma.

Nah Judah napeidung penui kap eh gah kebam benai nang n suiyi eh bam kerabe ma.

Nah nang penui rei de teu henui tei kerabe ma.

13 A minadung kap eh rei kebam tingba dau nnui penui gu namdi kiriedung ga nlüt kerabe ma.

Nang pie kerabe ma, yeo, nang! pa kap eh rei kecu benai pe kesiabe ga.

Nah nnui mipuidung pe mahei de rega teudi kerabe ma pa kap eh rei kebam dau.

14 Nah penui mbai lai eh kebamme de tui kerane nnui puihai ga sap kerabe ma.

Nah penui keherei kecu benai nang penuide ngauraume dage tui gaibeu kerabe ma.

15 Kedanemene heleuhdung pelane da RAMPAUBE tutiak tingba nna gwang zeu.

Nnui teikegai nzüt gade, cide nnui dage teigai zie,

nnui ziehi nnuikatei nnuida cailigwang zie.

16 Kedanemene a kemci lamlwatu gade nnui sak kecu nzwa, heleuhdung pelane de sak jüja bamzie.

Nah penui sak zie, nah penui mnwa zie, nah penui madaude lunggwang kemak nzwa dizie.

17 Dede Zion lamlwatu cide ga paklu kera ge bam zie,

nah cika kemcibe bam zie,

nah Jacob leuhme penuikatei penui gu mabamdung gumlu zie.

18 Nah Jacob leuhme mi nzwa dizie, nah Joseph leuhme miheu ge nzwa, nah Esau leuhme reigau nzwa. Nah penai leuhme ne Esau leuhme ru dizie, nah penuide mnwa dizie.

Nah cika Esau leuhme bangkelume migede gah dizie,

kedanemene RAMPAUBE rang dida.

19 Nah Negev ne Esau lamlwa de gumlu zie,

nah Shephelahme, Philistinme.

Nah penui Ephraim luh nah Samaria luh gumlu zie,

nah Benjamin, Gilead.*

20 Israel napeidung langgi kedi reugwame penui deu ga cailigwang zie, cipaume Canaanme, Zarephath ga kecang,

nah Jerusalem gade langgi kedi, cipaume Sepharad ga kebamme:

penui Negev namdidung de tui luzie.

21 Nah kelikebeume Zion lamlwa ga Esau lamlwa de tiak kerane hang zie,

nah hegwangram de RAMPAUBE gu dizie.*