1 Ih Rampaube de marengei ge gade ngau, recabam taiga sap kebam, nah pa aja kaigai, "Sum tsia peudung gage dapsüt gai iciu de pesing nlai di kerane.

Cidungde kedeu takcai gai eh peu minadung peu ga cak mielu,

nah penui pelane de Ih kingtie le gi tset dizie.

Penui migede pak tetdi gai lak,

penui migede mzia di gai lak.✝

2 Penui ketsaime deuga kuimie liede,

cika de a ba le penuide tui luzie.

Penui Tinggim mrahang liede,

cika de Ih penuide teu nghung dizie.

3 Penui Carmel deutu ga mbai liede,

cika de Ih penuide peei lwe tui luzie.

Penui a miak dwa gade dui kedi sing ga mbai liede,

cika de Ih henei dage aja peu zie, nah cide ne penuide nsau zie.

4 Penui hebaang tei di liede, penui ngauraume ne penuide tui tetdi liede,

cikade Ih kingtie dage aja kai zie, nah cide le penuide gitset dizie.

Ih a miak penui dage kai pwa bam zie penuide peu keherei kerane nah keyi ziemne ma."

5 Reugwame reu RAMPAUBE Tinggwang

kideu tung gai nah cide sui dizie;

cika lungh kebam leune hei eh hap dizie;

ci pelane hereuki nzwa cuh hang zie,

nah Egypt reuki nzwa cip mie dai zie.

6 Tinggim ga takswa tei kelube cide au pa delei,

nah kideu reu gage pa pe ting bang teilu.

Pa dui kedi gu duidung qugai la,

nah kideu zu gage penuide rui mpet kai la, pe zi au RAMPAUBE.

7 "Nnui a dwa de Cush deudi mena nzwa meni,

Israelmedung,

RAMPAUBE ne aide ndugai,

Ih Egyptme deu gade Israel de ngngwa mpet meni,

Crete gade Philistinme,

nah Kir gade Arameanme de?*

8 Pielo, RAMPAUBE Tinggwang au kemau puipung kebam hegwangram ga pe miak kai pwa bam dida,

nah Ih kideube zu gade cide ngkap dizie,

Ih Jacob leuhme pelane de tei ngkap dilak,

RAMPAUBE ne aide ndugai.

9 Pielo, Ih aja ge kai zie,

nah Ih heleuh pelane kakgade Israel leuhme de teu kecui gai zie,

mige nrei gage tsiu kehelia nzwa,

ciciu eh tangtsu ceutu nabe de hangdeu ga cak mie lak.

10 A minadung kemaume leune kingtie gade tsai zie,

‘Kengkap anui reu ga gwang lak mede redau lak’, de rang kelame.

11 Cipau nai Ih David hegwangram kaukedi paiki de teucuh luzie,

nah cide pang kebam de lamlui dizie,

kau kedi cide Ih teu cuh lu zie,

nah cide retak lwe ndaa tingba dung de nzwa lu zie.

12 Penui Edom ga bang kenzeu de luu luzie,

nah a zi gade qu kelu heleuh pelane,

RAMPAUBE ne aide ndugai, pa aide tei gai.✝

13 Pielo, petingbadung gwang zie, RAMPAUBE ne aide ndugai,

kepuhme ne kerumme de pakkah kedidau,

nah kubetsi tei kelame pebang leuh tei kelame de pakkah dizie.

Lamlwatudung zaukum zau beuzie,

nah hangdeutudung pelane cide lwa ncüt zie.

14 Ih a mina Israelme mibaang tei kela gade teu cailigwang dai luzie,

kau kedi namdidung de penui retak dai luzie nah cika lungh zie,

penui kube bangdung ling luzie nah pezau sak zie,

nah penui hegurie tei zie nah petsi tyei zie.

15 Ih penui gu kideu reu gage penuide linggai zie,

nah penuide madaude kideu gade paidai dilak,

Ih penuide peu kedi de,"

RAMPAUBE nnui Tinggwang ne ranggai.