1 Sam aide kingnei lu,

nnui Bashan hetumdung,*

nnui Samaria lamlwatu ga kebammedung,

nnui kegame de nneu kelame,

nnui kengha teu maisia kelame de tei keherei kelame,

nnui nahpeimedung dade,

"Anuide zau teu gwang beulo" de eh rang kelame.

2 RAMPAUBE Tinggwang pe kemci gade sampet dida,

"Pielo, tingbadung nnui da gwang zie

cidau penui kagwakdung le nnuide teugi dizie,

nnui pelane de heka kagwak le teugi dizie.

3 Nnui namdi kirie kepang kakgade mpet zie,

nnui mige ge kecu cide gade nzuizang eh mpet zie,

nah nnuide Harmon lambie ge kelien mpet dizie,

RAMPAUBE ne aide ndugai."

4 "Bethel namdi ga mie kemau tei lulo,

Gilgal namdi ga mielu nah kemau tei ngkiee lu,

tingcang ramsang nnui ratak teu gwanglu,

langcum ne cai ramsang nnui kereizige teugwang lu.

5 Tangku le ketwa ratak tei gailu;

suiyi makai peu kegaide cide rang ndu lia lu,

kedanemene aide nnui suiyi tei lula,

nnui Israelme,

RAMPAUBE Tinggwang ne aide ndugai.

6 Ih nnui namdi pelane gage herakum teugwang gaibeu,

nah nnui deu pelane ga peu tangku cam di.

Iciuliede nnui a da nreu cailigwang ma,

RAMPAUBE ne aide ndugai.

7 Ih nnui dade tingrui liede kamdi

luhlüt kera keicum ge bam reu kecudau liede.

Ih namdi ket ga tingrui peugai,

nah namdi kedadung ga tingrui peugai ma.

Hangdeu ket reuga tingrui gai,

dede hangdeu reuga tingrui gai kemak de cangdi.

8 Namdi kena mede kecum duisak kerane namdi keda ga mie,

dede nnung lu ma.

Iciuliede nnui a da nreu cailigwang ma,

RAMPAUBE ne aide ndugai.

9 Ih nnui dage nnui gu luh niadung lung kesia peugai.

Nnui guriedung kekiee ge,

nnui gu kube luhdung,

nnui gu nzüttsi bangdung,

nah nnui gu olive bangdung,

tangriemdung ne tyei nggah ciak di.

Iciuliede nnui a da nreugwang ma,

RAMPAUBE ne aide ndugai.

10 Ih Egypt deudi ga nzwa nnui dage rapia langgai.

Ih nnui rehangme de kingtie le teitset di,

nnui hekwendung teu tetdi,

nah nnui ramzeukidung ga ketsaipau timrim le

nnui ngkie kidung ga gwangdi,

Iciuliede nnui a da cailigwang ma,

RAMPAUBE ne aide ndugai.

11 Ih nnui namdidung kesa ngkap dida

Tinggwang Sodom nah Gomorrah ngkap kedi nzwa

nnui au tsingtie heu bam eh mi gade teu mpet kelu nzwa da

iciuliede nnui a da nreu gwang ma,

RAMPAUBE ne aide ndugai.*

12 Cine Israelme Ih nnui dage ma hingsüt kecu ge teigai zie;

nah Ih nnui dage ma hingsüt kecu ge teigai zie kecune,

nnui Tinggwang de redau kera mtei lulo, Israel!

13 Cine, pielo, lamlwatudung tei kegaibe

tingkai liede dam gai,

pe kecet peu minadung de cigai,

tingcang teipwa muiting di,

nah kideu kecehu henidung ga tetla,

RAMPAUBE, reugwame reu Tinggwang, cide pezi." *