1 Ainie Zion ga relui eh kebamme da keherei gwang zieda,*

nah Samaria deudi kideutu ga kwak kebamme,

heleuhdung gade mina kenlang yitume,

Israelme cipaume da kengha ziemne gwangla!

2 Nnui muiteume rangla, "Kalneh namdi ga mie delwe pielo;

cikade Hamath namdi ga mie lu, namdi kedi de;

pecai Philistiame namdi Gath ga hung lu.

Nnui hegwangram kena swa penui be yiki ni?

Penui deurai be nnui deurai swa diki ni?"

3 Ainie tingba kesiadung keu mpetti kelame da keherei gwang zieda,

nah kehebwak hegwangbam teugwang nnaki gaibeu.

4 Penui hepwa ngeu zeudung ga zeu la

nah penui bamtiedung ga bam.

Penui meurün hau gade meuründung

nah hetum ki gade hetumnadung teih tyei.

5 Penui leibungdung kwa eh kemie leidung tei;

penui David leibungdung ketei nzwa tei neula.

6 Penui hekwakdung gade zau sak

nah penui katei penui de macadung yitube le keniak,

dede Joseph leuhme kap kedine penui hei eh hap ma.*

7 Cine cu penui mibaang tei raitume de ngngwa eh hebaang tei dizie,

nah taktyeidung tyei eh mbau kebam de gah dizie.

8 "Ih RAMPAUBE Tinggwang, akatei a zi gade sampet gaila,

RAMPAUBE Tinggwang reugwame reu Tinggwang ne aide ndugai,

Ih Jacob hegie de a sui ma;

Ih pe kengking reketbam de ngkau.

Cine Ih namdi cika kebam pelane de pwa pe ngauraume de peu dizie." 9 Magade kilung cika mina hangkerei bang beu cai, ciciu cai penui tsaiciak dizie. 10 Cidau ketsaibe kibaume penui paau pwa kera gwang kecudau, ki gade ketsai paau pwa mpet kelu cai ketsai kelamluibe de, Magade pa kilung ga kebam be dade rang eh, "Cika mikangge ncu ngngwa bam reu ni?" Magade pa, "Ma," de rang cai. Iciu cai pa rang zie, "Zing de lu, kedanemene anui RAMPAUBE zi qu kerabe melu."

11 Cine, pielo, RAMPAUBE aja kaigai zie,

nah ki kedibe dap kecai dizie,

nah ki keceu be tei nsia dizie.

12 Hekwendung tangtsu tia gade pakla ni?

Mige hetumseudung de cika ngngwa puh lani?

Iciuliede nnui kemzuibe kereu pwa heiring teidi

nah kesamsang tsi de kekaa gage kai di.

13 Lo Debar reu nnui sui kelame,

penui rangla, "Anui katei anui kengking le Karnaim luulu meni?"

14 "Dede pielo, Ih nnuide renia kera heleuh ge teucuh gai zie,

Israel leuhme, RAMPAUBE Tinggwang ne aide ndugai, reugwame reu Tinggwang.

Penui nnuide teikeherei zie

Lebo Hamath gade gwang Arabah hereuki kecang."