1 Amos ma aidungde Israelme de lungpang kela, Tekoa namceu ga meurün kekwabe hangge, keuliakegai gade ngaulu, Uzziah Judah ga Hegwang ketei tingdau pa ma aidungde ngaulu, nah Joash napei Jeroboam Israel deuceu ga hegwang ketei tingdau, nlui keteu dwa mmi kena. 2 Pa ranggai,

"RAMPAUBE Zion gade sah gai zie;

Jerusalem gade pe sah kwa cuh gai zie.

Meurün kekwamedung gu tseheidung ki dizie;

Carmel deutu regui dizie."

3 RAMPAUBE ainzwa rangla:

"Damascusme gu kemau kecum de ziemne,

mdai de si eh,

Ih penuide saja peu bizie,

kedanemene penui hegeuniadung le Gileadme de dap kecune.

4 Ih Hazael hegwangki gage mi langgai zie,

nah cidene Ben Hadad hegwangpei kengking reketbam ru nggah dizie.

5 Ih Damascus kirieki tsiadung teipang dizie

nah Aven Chabak peureu kedibe de ngkap dizie,

nah Beth Eden namdi ga kedibe de si eh.

Aram minadung Kir deu ga hebaang tei mie dizie,"

RAMPAUBE rangla.

6 Ainzwa RAMPAUBE ranggai:

"Gazame gu kemau kecum de ziemne,

mdai de si eh,

Ih penuide saja peu bizie,

kedanemene penui mina pelane de hebaang tei eh,

Edomme ba gage penuide kai beudi.

7 Gaza namdi riedung gage Ih mi langgai zie,

nah pe kengking reketbam cide ru nggah dizie.

8 Ih Ashdod namdi ga mina lungh kebamme de

nah Ashkelon namdi ga hegwang kedime de ngkap dizie.

Ih Ekron namdi de saja peu zie,

nah Philistinme kebangbe tsaiciak dizie,"

RAMPAUBE Tinggwang rangla.

9 Ainzwa RAMPAUBE ranggai:

"Tyreme gu kemau kecum de ziemne,

mdai de si eh,

Ih penuide saja peu bizie,

kedanemene penui mina pelane de Edom dage kaibeu kedine,

nah caireiswacing samkak de teipang di.

10 Ih Tyre namdi riedung gage mi langgai zie,

nah pe kengking reketbam cide ru nggah dizie."*

11 RAMPAUBE ainzwa rangla,

"Edomme gu kemau kecum de ziemne,

mdai de si eh,

Ih penuide saja peu bizie,

kedanemene pa kingtie teu pe sinabe Israelme de gwaketang,

nah ngau kenggia pelane keu gidi.

Pe rata kezeu mene jüja ladi,

nah pe lunghop kelungtane ladi.

12 Ih Teman namdi gage mi langgai zie,

nah Bozrah hegwangkidung ru nggah dizie."

13 RAMPAUBE ainzwa rangla,

"Ammonme gu kemau kecum de ziemne,

mdai de si eh,

Ih penuide saja peu bizie,

kedanemene penui Gilead ga mipui tetlak kelame de rim mpet,

penui deuraidung tei mdi kerane.

14 Ih Rabbah namdi riedung gage mi mtau gai zie,

nah cide hegwangkidung ru nggah dizie,

hereu keregi benai sah gai zie,

tingkai gui süt kecu benai rahang de si zie.

15 Penui gwangpei mibaang tei tet dizie,

pa nah pecu ngngwa ncüt kela kedimedung,"

RAMPAUBE rangla.