1 Ainie, RAMPAUBE rang eh, cipau tingbadung nah cipau tingdau,

Ih Judah nah Jerusalem ga lungh keyi peudai zie.

2 Ih heleuhdung pelane hekwa zie,

nah penuide Jehoshaphat gu Langkam ga ngngwa gwang luzie.*

Ih cikade penui tutiak zie,

a minadung ziemne nah agu gum kera Israel ziemne,

heleuhdung kakga ge teizang kegai medung,

nah penui a deudi, Israel mzi kedine.

3 Penui a minadung ziemne dacak tei,

mipeina ge heli li kerane zwadi,

nah mipuina de zau ziemne zwadi

iciu eh penui saklu kerane.

4 Cu, nnui dai ziemne acu renia lano,

Tyre, Sidon nah Philistia cuikuidung pelane?

Nnui ma dung ge ziemne apau rui dai kera tei bam ni?

Magade nnui apau rui dai kera tei bam cai,

Ih zette nnui tei kegai dene saja nnui peu gage teu caili gwang dai beu zie.

5 Kedanemene nnui a rangkanggeu nah agu kecak keu pwa dida

nah nnui agu pemi kehung mabamdung nnui gu kereca kidung gage teu gwang luda.

6 Nnui Judah napeidung nah Jerusalem napeidung de Greekmedung dage zwa dida,

ci nzwa eh penui peu penui deu gade kemdei gage ngngwa gai lu kerane.

7 Pielo, Ih penuide kelungh mpet gaizie da, nnui ne penuide zwa kebeu bam gade,

nah nnui rui kegai de nnuikatei nnui peu ga teu cailigwang beu zie.

8 Ih nnui napeidung nah nnui napuidung de

Judah namedung dage zwa beu zie.

Penui Arabianme helila keteime dage zwa beuzie,

kemdei ga kebam leuh dage,

kedanemene RAMPAUBE ne rang beu dida lu.

9 Aide heleuhdung dage kereci gai beulo,

"Nnui hereu tei kera mteilu,

kengkieng minadung de kelung gai cu,

peu penuide gwang nna lu,

peu reugwame pelane de hang lu.

10 Nnui hepeidung kingtiedung gage reki lu

nah tsingsu kiedung hengei gage reki lu.

Peu kemnei mede

‘Ih au ngking,’ de eh ranglu.

11 Kelwalu nah gwanglu,

twagwa kebam heleuhdung pelane,

cika nnui gwang hekwa lu.

O RAMPAUBO, ngu kengkieng reugwamedung de ngngwa hunglu.

12 Peu heleuhdung de penuikatei nkia nrak lu

nah Jehoshaphat Langkam ga hanglu.*

Kedanemene cika Ih ntum lwe twagwa kebam

heleuhdung leune tutiak zie.

13 Tangkane le rum cu,

kedanemene luh be meu dida.

Gwanglu, delwe kubetsidung riak kecai gai cu,

kedanemene zauniakbam pui bam dida.

Zau kendwa bung dung pui nlim bam dida,

kedanemene penui kesia de kie ham kedine."*

14 Mina cangcang Tutiak Langkam ga bam.

Kedanemene RAMPAUBE Tutiak tingba Langkam ga nna bam kedine.

15 Tingnaimiak nah hekei mui dizie,

hegidung baa sita dizie.

16 RAMPAUBE Zion gade mrung zie,

nah Jerusalem gade pekwa sahbak gai zie.

Tinggimdung nah kideube mbeu dizie,

dede RAMPAUBE au pe minadung ziemne kensiu be zie,

nah Israel namedung ziemne kengkiengbam ge zie.

17 Cine Ih RAMPAUBE nnui Tinggwang,

Zion deutu nah lamlwatu kemci, ga kelungbe lie kecu ci luzie.

Iciu lude Jerusalem namdi mci luzie,

nah cikemakmedung migede cika tetkah si lak.

18 Cipau tingba gwang kelu benai

lamlwadung ga zau kekumbe le zau hua zie,

nah lamlwatudung gade tungdui lwa zie,

Judah reukidung pelane gade dui lwa dizie,

nah RAMPAUBE ki gade duilet ge pet dizie,

Shittim Langkam de dui peuzie.

19 Egypt au gikedi deu ngkap kedi ge dizie,

nah Edom au gikedi hetaideu ge dizie,

kedanemene Judah namedung dage keherei ta tei kegai ne,

kedanemene penui kemzuime de penui deu gade tei tset kedine.

20 Dede Judah au lungh lamui dizie,

nah Jerusalem au ceheu ramsang la dizie.

21 Penuide teitset kedi kum peeilu kemak de Ih ne peei zie,

kedanemene RAMPAUBE au Zion deutu ga lunghla.