1 Aide RAMPAUBE sam, Pethuel napei Caihakecibe Joel da kegwangbe.

2 Aide siulu, nnui hangkiamedung,

nah kingneilu, nnui Judea deudi ga lungh kebam pelane.

Ai kenzwa madaude nnui tingdau

mede nnui paume tingdau tei deni?

3 Cide n namedung da rangbeu,

nah n namedung penui namedung dage,

nah penui namedung pecai ceheu dage.

4 Dang kela tangriem ne püt kedidung de tangrim maadi nlai kela maa ne tyeilu;

tangrim maadi nlai kela maa püt kedibe nsau eh tet kela tangriem maa ne tyeilu,

nah nsau eh tet kela tangrim maa ne püt kedibe mateikemsia tangrim ne tyeilu.

5 Cuhlu, nnui zau sak kaudung, nah haplu!

Hei eh haplu, nnui pelane zau kesak medung,

kedanemene zau kekum de nnui mui gade dang mpet dida.

6 Adeu ga heleuh ge ncu renia kera ncuh lwe bam dida,

ngkieng nah pei kap gai kelak.

Penui geidung au hingho gei nzwa,

nah hinghopui geidung nzwa nzau.✝

7 Agu kubeluh teingkap dida

nah agu nzüt bangdung ria dida.

Pegeu gau lu nah kelien gi dida;

pe tsingkiakdung gau ha dida.

8 Haplu relei kemci pui rosopai bah lwe pa pe nahpei lai eh kebam ge tsit heei kecu nzwa.

9 Meiciu reca nah sak kera reca de RAMPAUBE ki gade dang gi dida.

Cingkumedung, RAMPAUBE kilamedung, hap bam dida.

10 Luhdung au mrwa dida,

hangdeu be hap bam dida kedanemene mei ciu tei msia kedine.

Zau kehecibe dung cangh dida,

macadung lwa ta dida.

11 Ngam lu, nnui heta ketamedung,

nah haplu, nnui kube gurie kwa kelamedung,

wheat nah barley ziemne.

Kedanemene luhlüt kera luh ngkap di delu.

12 Kubetsi bangdung hui dida nah nzüt bangdung cangh dida,

kuraletsi bangdung, palm bangdung nah tampaktsi bangdung,

luh ga tsingbang kebam pelane hui di.

Mina namedung dade suiyibe hui kedi ziemne.

13 Rosopai bah lwe haplu, nnui cingkumedung!

Recabam kwa kebam kilamedung, haplu.

Gwanglu, tingmuiziu pelane hei eh hap eh rosopai bahlu, nnui a Tinggwang kilamedung.

Kedanemene ciu mapeu nah sak kera mapeudung de nnui Tinggwang ki gage kai nzeu dida.

14 Kemci mmwang kera qulu,

nah kemci hemaa ge qulu.

Hangkiamedung nah cipau deu ga kebam heleuh pelane

RAMPAUBE nnui Tinggwang ki ga hekwa lu,

nah RAMPAUBE dage hap gailu.

15 RAMPAUBE tingba au gwang nna bam kedine.

Ngkiengtube Tinggwang kekap teugwang gai kera tingba.

Cipaunai kehing daikenzwa ge teugwang gai zieno!

16 Taktyei anui miak dwa gade keu mpet ti meni?

nah suiyi anui Tinggwang ki gade?

17 Heleuhdung hangdeu ga ki bam dida,

mei hekwa ki mrwa dida,

nah baudung de kau dida,

kedanemene ciu cangh kedine.

18 Makaunedung dainzwa mrung bam bie!

Kauruine haudung dainzwa zie bi cimene bam dida

penui tsehei gah kedine.

Nah meurün haudung de keherei bam dida.

19 RAMPAUBO, Ih n dage hap gaila.

Kedanemene mi le tsehei deu hetaideudung tyei nggah dida,

nah miheu le luh ga tsingbang pelane ru dida.

20 Luh ga makaunedung de n dage mra gai bam dida,

kedanemene hereukidung cangh kedine,

nah mi le hetaideu tseheidung tyei nggah dida.