1 Israelme Ih nnui reu gage hei eh hap eh rang kegai sam aide kingneilu.

2 Kemci Israel kau dida;

pa cuh dai si lak ta;

pecu pe deu gage gigai dida;

migede pecu teucuh beu kera gah.

3 RAMPAUBE Tinggwang aide ziemne rangla:

"Namdi gade mina cang ge ngngwa tet pet kegai gade haige rünne bang beuzie,

nah mina haige ngngwa tet pet kegai namdi gade kerei rünne bang beuzie,

Israel kilungme."

4 RAMPAUBE aide ziemne Israelme dage rangla:

"Acu peeilu delwe lungh lu!

5 Bethel de peei so;

mede Gilgal ga lüt so;

Beersheba ga mbeu mie so.

Kedanemene Gilgal au mibaang tei di bi zie lu,

nah Bethel magede ta dizie.

6 RAMPAUBE de peeilu delwe lunghlu,

mecai pa Joseph leuhme dage

mi nzwa heu pet zie.

Mi cidene ru nggah dizie,

nah Bethel ga pe hereu kak beu kera migede bam lak.

7 Mina cidungde kesamsang de pwa kekaadung tei di

nah kesamsangme de kelien mie kideu gage kai dila!"

8 Tinggwang Tialiangkileime nah Orion teigai;*

pa kemui pwa tingcang teidi;

pa tingba pwa tingmui teidi

nah jaaidi gade duidung de qugai;

pa cidungde rui mpet kideu reu gage kai.

Pezi au RAMPAUBE!

9 Pa kengkingme dage kengkap zette teugwang beula

iciu eh kengking reketbam ga kengkap gwangla.

10 Namdi rieki gade mi keheibe de penuide ledeu kegaime de ngkau la,

nah kesangbe kerangme keheibe de penui ngau nghet la.✝

11 Nnui kegahme de dauciem mie kecune

nah pe dade wheat pe qwa keuteu di kecune,

nnui tangtsule kidung teilu liede,

nnui cika lungh lak.

Nnui kubetsi luh keyidung bam,

dede nnui cikade ngau kelu zau sak lak.

12 Nnui pia dai kieege hezai gileu bi

nah n maudung dai dige di bi kecu Ih cibam,

nnui kesamsangme de tei keherei kelame,

hetau henim luu,

nah namdi rieki gade kegahme dade cainok dila.

13 Cine makecetme keheibe de peting cikenzwa dau mlei mene bamla,

cide peting be kesiane.✝

14 Kesiabe mene keyibe peeilu,

iciu eh nang ringlu kerane.

Cine RAMPAUBE, reugwame reu Tinggwang, nnuide ngngwa lazie,

nnui kerang nzwa eh.

15 Kesiabe ngkaulu, keyibe hunglu,

namdi kirie ga kemzuibe dwa cuhlu.

Iciu lucai RAMPAUBE, reugwame reu Tinggwang, Joseph leuhme bang kebeume de de ngaunggia beuzie.✝

16 Cine, RAMPAUBE ainzwa rangla,

reugwame reu Tinggwang, Rampaube

"Lungrei le petu pekungdung leune ga pui dizie,

nah penui puidikidung leune gade rang zie,

‘Ainie suisiet! Ainie suisiet!’

Penui heta ketame de ketsai nggia lulo quzie

nah ketsai nggia kecumedung de hap lulo zie.

17 Kubeluh pelane ga hap bam dizie,

Ih nnui kakgade tet kahgwang zie kecune,"

RAMPAUBE rangla.

18 Ainie keherei gwang lada nnui RAMPAUBE tingba ngauneu kelame da!

RAMPAUBE tingba de daitei nnui regui lano?

Cide kebaa mene kemui ge zie,

19 mige hingho ge dade pak kela dau

hegum ge pecu redau kelu nzwa,

mede pa ki gega gwang eh tangdeu gage peba kai

eh henei ge ne pecu nsau kedi nzwa.

20 RAMPAUBE tingba kebaa mene kemui tingba ge lak ni?

Suisiet lepui nah kebaa gah eh?

21 RAMPAUBE rang eh, "Ih ngkau, Ih nnui hengyidung a suima,

nnui ngkwa kebam hemaabe de a suima.

22 Nnui keru recadung nah mei recadung acu peu liede,

Ih cidungde luu lak,

mede nnui gu makaune pelui keyibe le hemaabe recadung tei kegaide de Ih pie lak.

23 A dade nnui lei kwadung keutet di lo;

Ih nnui leibung kwadung kingnei lak.

24 Cipau nding gade, peu kemzuibe de dui nzwa lwa lu,

nah kesamsang de peu hereuki cangh dila kemak nzwa lwa lulo.

25 Israel leuhme, nnui mmi riakdai ge hetaideu ga keladau

ratak nah reca teugwang acu peu ni?

26 Nnui Sikkuth miedung pwa cuh, nnui gwangpei,

nah Kaiwan, nnui gu hegi rabe,

nnui katei nnui ziemne tei keludung de.*

27 Cine Ih nnuide Damascus gwale ge langgi dizie,"

RAMPAUBE rangla,

pezi au reugwame reu Tinggwang.