1 Hengam kegah heleuhdung, nnuikatei nuide ngngwa ngkwalu nah ngkwa ncütlu,

2 hezai de gwang di kemak dwa gage nah ciurie gah di kela nzwa,

RAMPAUBE rata nah lunghop nnui da gwang di kemak dwa gage, RAMPAUBE lunghop nnui da gwang di kemak dwa gage.

3 RAMPAUBE de peeilu, kideu ga hena eh pe sam kai kebeu mzai kela mina leune!

Makesang be peeilu. Kehena de peeilu,

ciciu kelu gade RAMPAUBE pe rata kedi benai ncu gum luzie.

4 Gaza namdi de au gi dizie, nah Ashkelon namdi au ngkap dizie.

Penui Ashdod namdi de tingna dau gwagi dizie, nah penui Ekron namdi de ngkap dizie!

5 Co jaaidi kung ga kelunghme kau dida, Kerethite leuhmedung! RAMPAUBE nnui reu gage kemmau sam rang gai dida,

Canaan, Philistiame deu. Ih nnuide ngkap dizie migede bang zeu kemaktane.*

6 Cine jaaidi kung dung de meurün kekwame ziemne tsehei bam ge dizie nah meurün bam ge dizie.

7 Duidikui cuikui de Judah kilungme bang kelume ne gum dizie,

aidungde ne cika penui kaunedung pie dizie. Penui minadung tingmui Ashkelon kiga zeu zie,

kedanemene RAMPAUBE penui Tinggwang penui de gum luzie nah penuide peu lunghyi dai luzie.

8 "Ih Moabme de ki nah Ammonme henui tei kebam kwa siu

penui a minadung de mneu nah penui deurai de hebwak kecudau.

9 Ciziemne, Ih ring kebam nzwa, aide reugwame reu RAMPAUBE ne ndu gai, Israel Tinggwang,

Moab au Sodom nzwa dizie, nah Ammon mina dung Gomorrah nzwa dizie;

hetu bam ge nah mcai koiki ge dizie, madaude lungh gai kelak deu ge dizie.

Dede bang kelu a minadung penuide gwa dizie, nah bang kelu a minadung cide gum luzie."*

10 Ainzwa eh Moab nah Ammonme da gwang zie penui zai kedi de ziemne, kedanemene penui reugwame reu RAMPAUBE de ki nah nuineu kela ziemne. 11 Ciu eh penui RAMPAUBE de hing dizie, kedanemene pa kideu ga rabedung de tei nggah dizie. Mileune pecu reca zie, pekatei pe deu rip gade, jaaidi kung leune ga kelungh gade de.

12 Nnui Cushitme de de a gu kingtie lepwa kui dizie,*

13 nah Tinggwang tingpeule lungh kebamme de nah Assyria deudi de ngkap dizie,

ciu eh Nineveh namdi de gidi eh ngkap dizie nah hangdeu ketsai deu swa de kecang deu ge dizie.*

14 Cide ga makaune bam ge tei dizie, heleuh be gu makaune pelane,

deucang deu nah makoiki ga kelungh biangkang dung hecia dung ga pebam tei zie.

Penui kenra kwa hebaki gade siu dizie; tet kenggwa ni ga tangtsudung pang dizie; hezu keyi cedar ciadung sia dizie.

15 Aide hetwa kepung namdi mage de hing mene lungh bam,

de eh penui mlung ga cet la, "Acu migede ngngwa nsam lu kera gah."

Cide kengngi keulia kebam ge, teikuudung kebam ni ge dizie.

Cide tet kah leune rata kwa sah eh kedeiga ba lia la.