1 Jerusalem namdi ga kekap gwang zie! Kebwak kela namdi de tei msia dida.

2 Pa Tinggwang rang kegai kwa kingnei ma, mede RAMPAUBE ledeu kegaide mnei ma.

Pa RAMPAUBE de nlum ma nah Tinggwang da gwang si dai lak ta.

3 Kedime au hingho mra kelabe dung nzwa.

Pe tutiakmedung au heneudung tinghegi gage tyei ciaklu eh tingcang tyei kera gah dila.

4 Caihakecimedung da samzai kegah nah heleuhbe de ngngwa kebwak la.

Cingkumedung kemcibe dung tei hera dila nah hezai gika kecu ta tei la.

5 RAMPAUBE penui dwa de kemzuibe teila. Pa petabe teila.

Tingcang ramsangne pa kemzuibe pwa peu la! Cide keba gade kebai di lama, dede kesiamedung au hengam penui da gah.

6 "Ih heleuhdung de ngkap dida, penui kengkieng reketbamdung de sia dida.

Penui gu puidikidung Ih tei msia dida, ciciu eh cide ga mide tet ngwa ta dizie.

Namdibe tei msia dida ciciu eh cide ga migede lungh dai gai lak.

7 Ih ranggai, ‘Acu kehing de nnui da bam lu zie. Ledeu kegai de mzai zie

nah lungh kebam ki de nnui gi dilak ciu eh nnui dage tei gai zielie kebamdung keu hezia beu zie.’

Dede tingcang gade penui tah kesia teineu dila.

8 Cine acu kwa bamlu, RAMPAUBE ne aide ndu kegai, Ih cuh eh kemau tei kelame de ngkap di kemaktane.

Heleuhdung de teu hekwalu kera Ih mtei lu da, hegwangramdung de teu hekwalu kera,

ciu eh penuide peu a rata cui pelane penui reu ga kailu kerane;

ciu eh heu kebam a lunghop de gage kideube de ngkap dizie.✝

9 Ciciu liede Ih mina samrangdung de tei mci beuzie,

ciu eh pelane ket tei eh RAMPAUBE zierang teilu kerane.

10 Cush reuki gwale kelungh acu reca kelame, a mina lungh zangra kelame, a dage recadung teugwang gaizie.

11 Cipaunai nnui tah gade acu renia kela leu de Ih hengam tei dilak,

cipau tingdau nnui kakga penuide mning mdi kelame de keugi dizie,

nah nnui au a gu kemci lamlwatu ga kemmau be tah teisi dailak.*

12 Dede hena kelame nah kegame de nnui kakgage kaigai zie,

nah penui RAMPAUBE zi gade kemsiu ngau luzie.

13 Israel bang kelume kemmau tah tei silak mede kenretdung rang lak,

nah penui mui gade kecwa sam gede rang lak;

cine penui lungyi nah kwak luzie, nah migede penui da kengngi teugwang beu lak."✝

14 Lei teilu, Zion napuidung! Sah gai lu, Israelmedung.

Renga lu nah nnui mlung pekie teu pecu twa lo, Jerusalem napuimedung.

15 RAMPAUBE nnui dade saja de keu hezia dida; Pa nnui ngauraume de gwagi dida!

RAMPAUBE au nnui kakga Israel gwangpei. Nnui madau gede kesiabe de hing lak ta!

16 Cipaunai penui Jerusalem dage rang zie,

"Ngngi so, Zion. Nnui ba bari bam diso.

17 RAMPAUBE nnui Tinggwang au nnui kakga bam, Pe kengkieng ne nnuide keli beuzie.

Pa nnui ziemne Pesui yi luzie; pe keku ziemne nnui ziune bam luzie;

Pa nnui ziemne Pesui keyi kwa sah zie.

18 Ih suisiet pung kelame, ketyei ngyi ga mie lu kemakme de qu hekwa luzie,

ciu eh nnui hengam ngau si dai lak.

19 Ainie, nnuide tei keherei kelame de Ih renia zie.

Cidau, swa eh sia kelame nah mi sipei la kemakme ma pie luzie.

Ih penuide peu hetwa kepungme, nah penui hengam tei kela gade kideu ga kemdume teibeu zie.*

20 Cidau Ih nnuide teu swa beu zie; Ih nnuide teu hekwa luzie.

Ih kideu heleuhdung pelane de peu nnuide herüt peu zie nah twa zie, Ih nnuide peu lungyi dailu kera ci keludau,"

de eh RAMPAUBE ranggai.