1 Darius Persia ga hegwang mmi kena bekum, kei herok bekei, hekei raitu benai, RAMPAUBE caihakecibe Haggai dade Judah deuceudi Shealtiel napei Zerubbabel nah cingku kedibe Jehozadak napei Joshua dage ranggai, 2 "Reugwame reu RAMPAUBE ainzwa ranggai: Mina aidungde ainzwa rang, ‘Anui gwang kera mede RAMPAUBE ki tei kera ting mereu.’" 3 Ciciu eh caihakecibe Haggai dage RAMPAUBE sam ranggai,

4 "Nnuikatei ki tei kelu ga nnui lungh bam eh,

kerecaki aide peu kauzeu bam zieni?

5 Cine cu reugwame reu RAMPAUBE sam aide ranggai:

Nnui dainzwa lungh labi ci lulo!

6 Nnui heleuh kekiee ge linggai, dede kecam nage luhlüt lu; nnui tyei dede nggei luma;

nnui sak dede sakmie luma. Nnui painia teu dede nnuide teilum luma,

nah mahi ketyeime penui mangau de penui hebiena ketip gage kekai nzwa!"

7 Reugwame reu RAMPAUBE ainzwa ranggai:

"Nnui dainzwa lung labi cilu lo!

8 Lamlwa ga mie tsing pwa gwang a kerecaki teilu;

ciu lucai Ih a suiyi ngau luzie, nah a zi ndu luzie, RAMPAUBE ainzwa ranggai."

9 "Nnui ngau kielu kera peei, dede pielo! kecam nage gwale nnui kilung teu gwang luma, Ih cidung teizang kedine!

Dai ziemne no?" Reugwame reu RAMPAUBE penuide peu cigai.

"Kedanemene kerecaki be sia bam dida, cinzwa eh pelane nnui kilung ziemne nnui ta tei la dida.

10 Kedanemene tinggimdung gade nnui ziemne hezin peu kelade mtak dida, nah kideu gade ngaulu keladung ngkui dida.

11 Kideu ga nah lamlwatudung, meitsi ga

nah zau keheci, maca nah kideu ga lulwet cang dizie,

mina da nah makaunedung, nah nnui tei kegai dung reu kecang langgai dida!"

12 Pecai Shealtiel napei Zerubbabel, nah Jehozadak napei cingku kedibe Joshua, langgi kedi gade cailigwang kelume, RAMPAUBE penui Tinggwang samdung nah caihakecibe Haggai samzai teilu, kedanemene RAMPAUBE penui Tinggwang ne pecu langgai nah minadung RAMPAUBE de kehing penui da bam di. 13 Pecai Haggai, RAMPAUBE sam paukelabe minadung dage RAMPAUBE sam pau nah ranggai, "Ih nnuide ngngwa la!, aide RAMPAUBE rang ndu kegai!"✝ 14 Cine deuceudi Judah, Shealtiel napei Zerubbabel nah cingku kedibe Jehozadak napei Joshua nah cailigwang kelu medung, rabe ne penui lung tei beu eh reugwame reu RAMPAUBE penui Tinggwang kerecaki ga heta tei bam di 15 aide Darius hegwang mmi pekena bekum kei herok zie ngkai-mdai benai.