1 Kei hena bekei zie ngkai-ket benai, RAMPAUBE sam Haggai caihasam kecibe da ranggai, 2 "Judah deuceudi Shealtiel napei Zerubbabel, nah Jehozadak napei Joshua cingku kedibe, nah mina bang kebamme dage sam aide rang lo beu.

3 Nnui kak ga caudung ge

kerecaki ndaa nzwa pekeyi kebam ngau no?

Cu cide nnui dainzwa ngau bam no?

Cide nnui miak gade magede kemak nzwa dide meni?

4 Cu au kuu lu Zerubbabel!, aide RAMPAUBE rang ndu kegai,

nah kuu lu, Jehozadak napei cingku kedibe Joshua;

nah kuu lu, kideu cika kelungh leune!, aide RAMPAUBE rang ndu kegai,

nah nnui ta teilu, kedanemene Ih nnuide ngngwa la!, reugwame reu RAMPAUBE aide rang ndu kegai.

5 Nnui Egypt gade mpet kelu dau nnuide ngngwa samkak aide tei luda,

nah a rabe nnuide ngngwa la. Nnui ngngi diso!

6 Kedanemene reugwame reu RAMPAUBE ainzwa ranggai: Tie kemakne

Ih ting kideu, jaaidi hangdeu kecang dung tei kelai gai dai zie!

7 Ih heleuh leune tei kelai gai zie, nah kideu pelane acu ma pemi kehung pwa peuzie,

nah reca ki de kendu le tei pui lu zie de reugwame reu RAMPAUBE rang ndu kegai.

8 Rangkanggeu nah kecak dung au agu!, reugwame reu RAMPAUBE rang ndu kegai.

9 Kerecaki kendu de kerai dau swa paucai be di gwa dizie, de reugwame reu RAMPAUBE rang ndu kegai,

nah heni aide ga Ih lungciep teu gwang beuzie!, aide reugwame reu RAMPAUBE rang ndu kegai."

10 Darius tingdau mmi pekena bekum kei hekui bekei zie ngkai eh mdai benai, RAMPAUBE sam caihasam kecibe Haggai da ranggai, 11 "Reugwame reu RAMPAUBE ainzwa ranggai: Hezai ziemne cingkumedung dade keteu nah ranglo, 12 ‘Magade mige RAMPAUBE dage heteih pwa reca peu kera de pe pai gage dum teu la cai, nah pedum cide tangku, zau mede maca, mede taktyeipok kehei gede teu ncüt dicai, cidung mci dizie ni?’" cingkumedung samkeligai "Ma" de ranggai. 13 Pecai Haggai rangdi, "Magade mige ketsai pau tung kedi ziemne hera di eh keda dung tung dicai, cidung hera di zie ni?" Cingkumedung rangdi, "Yeo, cidung de hera dizie." 14 Cine Haggai ranggai, "Cinzwa eh a dwaga kebam mina aidung nah heleuh aidung de cikenzwa medung da!, aide RAMPAUBE rang ndu kegai, penui heta aidung pelane tei gai. Penui acu peu kegai dung au hera! 15 Ndaa ting gade cu kecang nnui mapie kebeu cu au nnui lung ga nsung lulo. Ndaa au tangtsu ge reu gage tangtsu ge RAMPAUBE kereca ki gage kai pwa bam la. 16 Cine dainzwa no? Mei tum ngkai* kebam de nang mie pie kecudau, cika tum kerei* gwale ga; nah nang zaula riakngei ge* pwa kera ziemne mie, dede cika ngkai rünne gwale gah. 17 Nnui tei kegai leune rwa dida nah Ih nnuide tei keherei gai, ciciu gai liede nnui a da cailigwang luma, aide reugwame reu RAMPAUBE rang ndu kegai. 18 Henai tingba gade nsung lulo, kei hekui zie ngkai-mdai benai, aipau nai gade RAMPAUBE kerecaki pe bangdwa kelu nsung la lulo! 19 Kehekwa bam ga heleuhdung bamreu ni? kubebang, nzüttsi bang, kuraletsi, nah olive bang petsi bui beu meda! Dede henai gade Ih nnuide samlam beuzie!"

20 Pecai RAMPAUBE sam pekenabe hekei zie ngkai-mdai benai Haggai dage ranggai, 21 "Judah ga deuceudi, Zerubbabel da sam aide rang beulo,

‘Ih tinggimdung nah hangdeu teu kelai dizie.

22 Kedanemene Ih hegwangbam tei ngkap dizie nah heleuh leune hegwangram kengkieng dung keugi dizie!

Ih bagidung nah teu kelame de ngkap dizie; hekwendung nah cwa kela medung de teikau dizie, penui ketket de penui siname kiengtie ziemne gi dizie.

23 Kengkieng RAMPAUBE sampet aide peu gaila, Cipaunai Shealtiel napei Zerubbabel a gwa tei kera Ih ncu kedet luzie, aide RAMPAUBE ne rang ndu kegai.

Ih ncu kengkieng peu zie, kedanemene Ih ncu kedet kelune!

aide reugwame reu RAMPAUBE rang ndu kegai!’"