1 Darius Persia gwang tei kelu mmi kena bekum kei heset bekei, RAMPAUBE sam Iddo napei Berechiah napei Zechariah, caihakecibe da gwang, rang eh,* 2 "RAMPAUBE nnui paumedung de perata süt dida! 3 Penuide ranglo, ‘Reugwame reu RAMPAUBE aide rang bam:

A da nreu gwanglu!, aide Reugwame reu RAMPAUBE ne ndu gai,

nah Ih nnui da cailigwang zie, Reugwame reu RAMPAUBE rang.*

4 Nnui paumedung nzwa lung diso ndaa caihakecime penui dage nra kegaide, rang eh, "Reugwame reu RAMPAUBE aide rang: Nnui kesia lampuidung nah kesia tah keteidung gade nreu lu!" Dede penui kingnei ma nah a dage helung kaima, aide RAMPAUBE ne ndu gai.*

5 Nnui paumedung, penui daiga bam no? Caihakecimedung daiga bam no, penui aika kelungta bam ni?

6 Dede a samdung nah a ajadung a kilame caihakecimedung dage Ih ne teilu lo kebeu bedung,

penui nnui paumedung de gikah tetdi meluini?

Cine penui mau petlu nah rangdi, ‘Reugwame reu RAMPAUBE ne anui lampuidung nah tadung nsam gade anui dage teigai kera riem kegai nzwa, ciu eh pa ne anui dage teigai.’"✝

7 Kei kereieket zie ngkaiehmdai benai, cide au Shebat bekei, Darius hegwang ketei mmi kena bekum, RAMPAUBE sam Iddo napei Berechiah napei Zechariah, caihakecibe da gwang, rang eh, 8 "Ainie! Ih ting kemui dau mige hekwen kegie ge teu kela ngau, nah pa myrtle bang kakga hangdeu langkam ga la; nah pecai ga hekwen kegie ge, kegie kedau ge nah keha ge la."✝ 9 Ih ranggai, "Hekwen aidungde daino, Rampaubo?" Cidau tinggimgwame acu ngngwa mpau kebamme ada ranggai, "Ih ncu hekwen aidungde daibi keulia zie." 10 Pecai myrtle bangdung kakga sap kebambe keli gai nah rangdi, "Cidungde de RAMPAUBE ne kideu pelane ga rwa kera lang mpet gai." 11 Penui RAMPAUBE tinggimgwabe myrtle bangdung kakga sap kebambe dage keli; penui pe dage ranggai, "Anui kideu pelane ga rwa mie; pielo, kideu pelane mtak sünne nah relui bam."

12 Ge RAMPAUBE tinggimgwabe keligai nah rangdi, "Reugwame reu RAMPAUBE, nang dai tiege Jerusalem de nah Judah namdidung dage ngaugia keulia mene bam luzie no, nang mmi riakhena ge nrata eh bam kedi de?"✝ 13 RAMPAUBE acu ngngwa mpau kegai tinggimgwabe dage sam keyidung, kenciep samdung le keligai. 14 Cine tinggimgwabe acu ngngwa kempau kegaibe ne a dage rang, "Qu gai nah rang lo, ‘Reugwame reu RAMPAUBE aide rangla:

Ih Jerusalem nah Zion ziemne a lungnei süt bam!

15 Heleuhdung lungnei gah eh ziune lungh kebamdung de a rata süt.

Ih penui da a rata nghim kebam dau, penui kengkap a kemning swa tei ngkiee si gai.

16 Cine Reugwame reu RAMPAUBE aide rang:

Ih ngaugiadung teu Jerusalem ga cailigwang luda. Cikage a reca ki tei luzie,

aide Reugwame reu RAMPAUBE ne ndugai, nah kemdet tie kezang pet Jerusalem leune ga mdet zie!

17 Qugai dailo, rang eh,

‘Reugwame reu RAMPAUBE aide rangla: A namdidung lungh keyi le pui dai luzie,

nah RAMPAUBE Zion dage lungciep peudai zie, nah pa Jerusalem de pe kemlang namdi kedet dai luzie.’"

18 Pecai Ih a miakdung ngang cuh piegai nah makaune kiidung mdai ngau! 19 Tinggimgwabe acu ngngwa kempau kecube dage Ih rang, "Aipau kiidung de dai no?" Pa acu keligai, "Makii aidungde Judah, Israel nah Jerusalem de teu zangra kedidung de da." 20 Cidau RAMPAUBE a dage hetaciem kecime hangmdai de liagai. 21 Ih ranggai, "Mina aidungde dai tei kerane gwang lano?" Pa keligai, nah rang, "Ma kii aidungde ne Judah de teu zangra di iciu eh penui migede de peu pepeu ngangcuh melu kerane. Dede hegeu kerekime penuide keheu kerane gwang, heleuhdung gu pekiidung teu cuh pwa Judah deu de renia eh teu zangra di melu kerane."