1 "Hadrak deu nah pe kemtak ni Damascus namdi ziemne aide RAMPAUBE ne ndu kegai sam; kedanemene minadung pelane nah Israel leuhme RAMPAUBE de pie kebamne. 2 Ndu kegai sam aide Damascus de twagwapung kebam Hamath deu de ziemne de si, nah Tyre nah Sidon namdi de ziemne de si, kedanemene penui macisüt kebamne. 3 Tyre pekatei pe ziemne kengkiengbam ge kwacuh lu nah rangkanggeu le rebui nzwa kebaulu nah kecak teihemi kelube lampuidung ga niaksai nzwa. 4 Pielo! Rampaube pa kebambe leune keuteu dizie nah jaaidi gade pe kengking tei ngkap dizie, cinzwa eh pecu mi le ru ngkap dizie. 5 Ashkelon namdi aide ngau eh hing dizie! Gaza namdi de hing eh mbeusütdi zie! Ekron namdi, pe keregui gah dizie! Hegwangpei Gaza gade gah dizie, nah Ashkelon ga mide lungh tadi zie! 6 Sangme ne Ashdod namdi gage penui ki tei zie, nah Philistiame ngang kelade tei hena dizie. 7 Kedanemene Ih penui jai penui mui gade keu mpetdi zie nah penui heta kesiadung de penui geilim gade keu mpetdi zie. Ciu eh Judah leuhme ge nzwa penui Tinggwang ziemne bangkelume ge tei dizie, nah Ekronme Jebusiteme nzwa dizie.

8 Ih a deu kwalu zie nah ngauraume gu reugwame de peu cika kahgwang mede caili lak, mide tei keherei kelame a mina reu ngking gai lak, kedanemene Ih cu a miak le ngaulu delu!

9 Nnui sui yi eh sah lu, Zion minadung! Suiyi kwa sahlu, Jerusalem minadung!

Ainie! Nnui gwangpei nnui da masang eh gwangla

nah nnuide kelibeu bam. Pa au pezai hena nah gada reu ga tetla, gada na ge reuga.*

10 Pecai Ih Ephraim dade bagi keuteu dizie nah Jerusalem gade hekwen keu gidi zie,

nah hereu ketei gade lakpi keu gidi zie; kedanemene pa heleuhdung dage kezuyibe ranggai beu zie,

nah pe kengkieng jaaidi ge gade jaaidi ge ga kecang zie, nah Hereuki gade kideu nlidung kecang!*

11 Nnui ziemne au, a samkak jai de nnuida la kecune, Ih nnui baangme de dui kegah tekwa gade keli beu zie.* 12 Kengkiengbam ga cailigwang lulo, keregui kebam hebaangmedung! Henai de Ih nnui dage kena kieege peu dai beuzie de ranggai la, 13 kedanemene Ih Judah de a lakpi ge nzwa pwalu da. Ih Ephraim de le a lakpitsibung tei pui luda. Zion, Ih n napeimedung de teu ncuh luda, Greece, n napeimedung de regi kera, Zion, Ih ncu reugwame kingtie ge nzwa tei luda!"

14 RAMPAUBE pe minadung dage pecu lia gai zie, nah pe lakpitsidung tingkehepik ge nzwa kap mpet zie! A Tinggwang RAMPAUBE telui kwa gai zie nah Teman gade rahangdung de nzang gwang zie. 15 Reugwame reu RAMPAUBE penuide gumlu zie, nah penui penui ngauraume reu ngkinglu zie nah tangnungtsidung de ngamlu zie. Pecai penui sak eh sak kemieme nzwa sah zie, nah penui zau le hekwakdung ge nzwa puilu zie, recabam kimiakdung nzwa. 16 Cine cipau benai RAMPAUBE penui Tinggwang penuide kelibeu zie, pe minadung kauhau nzwa. Penui au hegwang peurwa ga pemi kewhung tangtsudung nzwa pe deu ga baa bam zie. 17 Daikenzwa gede yi nah daikenzwa gede hezuyi zie bi! Rehangme meitsi gade nah relei kemcime zau kekumbe gade lungh yilu zie!