1 Ge tinggimgwabe acu resiu kebambe de nreu gwang nah mige zip bam eh tei nrak kegai nzwa acu tei nrak gai. 2 Pa a dage ranggai, "Nang daipai ngau zeu no?" Ih ranggai, "Kecak le tei kelu mitaubung bam ge ngaubam, pe reu ga ma kwak ge bam eh. Cika mitaubung hena bam nah mitaubung reu ga kemtauriadung pe ramcau bam. 3 Pe mbie ga olive bang kena ge bam, ket hekwak zetle nah kedage hile bie bam." 4 Cine acu resiu kebam tinggimgwabe dage Ih ranggai dai. Ih ranggai, "Aidungde pekie daino, a mpaubo?" 5 Tinggimgwabe acu resiu kebambe de acu keli eh ranggai, "Nang aidungde daibi pe kie cimeni?" Ih ranggai, "Cima, a mpaubo." 6 Cine pa a dage ranggai, "Aide RAMPAUBE Zerubbabel* dage sam kai kegai de da: Renci le ma mede kengkieng le ma, dede a Rabe le, de eh Reugwame reu RAMPAUBE rang. 7 Nang daino, lamlwatu kedibe? Zerubbabel dwa gade nang au langkie ge dizie, nah pa tangtsu nreutu de kamgai de, minadung sah zie ‘Ngaugia! Ngaugia!’"

8 RAMPAUBE sam a da gwang, rang eh, 9 "Zerubbabel ba le aipau ki bangdwa teigai da nah pe ba le aide teicang zie." Iciude nang ci luzie Reugwame reu RAMPAUBE ne acu n da langgai lie kecu.

10 Cauge ne makeceunadung tingba de mlai dino? Mina aidungde pesui yilu zie nah Zerubbabel ba ga kemdet tangtsu kela de ngau zie. (Mitaubung hena aidungde RAMPAUBE miakdung kideu reu pelane ga rwa kela deda.)✝

11 Pecai Ih tinggimgwabe de keteu gai, "Mitaubung gu zetle nah hile ga olive bang kena sap kebam pekie daino?"✝

12 Ih pecu piage keteu gai dai, "Kecak ca kecak ping kena gade lwa mpet kebam mbie ga olive kiak kena kebam pe kie daino?" 13 Ge pa a da ranggai, "Nang aidungde daibi pe kie cimeni?" Ih ranggai, "Cima, a mpaubo."

14 Pecai tinggimgwabe rang, "Mina aipau kena de Tinggwang ne pe tatei kerane kedet nah keniak kelume da, kideu pelane reu Rampaube."