1 Ainie! RAMPAUBE hetutiak tingba de gwang zeuda nnui ma süt kelude nnui kebam gade mzi pwa dizie. 2 Kedanemene Ih heleuh pelane de Jerusalem de renia kera teugwang hekwa lu eh hereu tei kerane nah namdi cide tuilu zie. Hekidung ga hema dungde keuteu dizie nah mipuidung de teuhdi zie. Namdi pempie gede ngngwa tet eh hebaang teizie, dede mina kebangdungde de peu namdi gade ngngwa tetdi lak. 3 Dede RAMPAUBE tetpet zie nah heleuh cidungde de ngngwa hereu teizie pa hereu tei eh keregi cu benai nzwa. 4 Cipau benai pe pi Olive deutu ga sap zie, cide au Jerusalem caile naimiak kepetle ga. Olive Deutu de di süt kecu chabak ge ne naimiak kepetle nah naimiak kenlütle kakgage mzi pempie tei dizie nah lamlwa pempie naimiak kepetle nah naimiak kenlütle lambie ge caili mie dizie. 5 Pecai nnui RAMPAUBE lamlwadung kak chabak ga pak hung zie, kedanemene cipau lamlwadung kak chabak de Azel ga gwangcang zie. Judah gwangpei, Uzziah tingbadung nlui teu kecu gade pak kecu nzwa eh nnui pak zie. Pecai RAMPAUBE a Tinggwang gwang zie nah kemcime pelane peda la dizie.* 6 Cipau benai cika kebaa bam lak, dede ngkung mede nchui de lak. 7 Cipau benai, tingba cide RAMPAUBE rünne ci, cika tingba mede tingmui bamsi lak, kedanemene tinghegi de kebaa ting dizie.* 8 Cipau benai kering dui Jerusalem gade lwa pet zie. Penui pempie ge naimiak kepetle jaaidi nah naimiak kenlütle jaaidi gage lwa gai zie, hepwak dau nah tingka dau.*

9 RAMPAUBE ne kideu reu pelane ga hegwang tei zie. Cipau benai cika RAMPAUBE bam zie, ket Tinggwang, nah pe zi rünne.✝ 10 Hangdeu pelane Arabah de nzwa dizie, Geba namceu gade Rimmon namceu ga Jerusalem gu tingbangle. Jerusalem teuncuh bammui zie nah pekatei pe heni ga, Benjamin Kirie gade daiga heni raitube kirie bambi, Kimiak Kirie ga, nah Hananel renei gade hegwangme zau keniakbam ga. 11 Minadung Jerusalem ga lungh zie nah cika penui reuga Tinggwang ne ngkap zing kecu bamsi lak. Jerusalem ziune eh lungh zie.✝

12 Jerusalem de hereu tei renia kecume mina pelane de RAMPAUBE rapia aide le ketang zie: Penui pumteih tim dizie penui pi ne sap eh bam liede. Penui miakdung pekoiki ga pangpop zie nah penui mleu penui muidung ga pangpop zie. 13 Cipau benai RAMPAUBE dade kengngi kedi cide penui kakga gwang zie. Hangge ge kecu kedabe ba tui zie, nah hangge pe ba hwacuh kedabe ba de renia zie. 14 Judahme liede Jerusalem de renia eh keregi zie. Penui twagwa kebam heleuh pelane mahei de keu hekwa luzie, kecak, rangkanggeu, nah paihenidung keyi kekiee ge. 15 Rapia ge hekwendung nah hekwen keceunadung da liede gwang zie, utdung nah gadadung, nah makaune pelane cipau ramzeukidung ga kebamme rapia cide gade keherei zie.

16 Pecai cide teigwang zie ciu eh cipau heleuhdung ga kebangbe pelane Jerusalem de renia gwang kecume iciu meliene mmi ramsangne hegwangpei reugwame reu RAMPAUBE de reca kera tet hang zie, nah Paiki Ngyi de mneilu kerane. 17 Cide teigwang zie ciu eh migede kideureu ga heleuhdung pelane gade hegwangpei RAMPAUBE de reca kera Jerusalem ga hang melie cai, iciu cai reugwame reu RAMPAUBE penui reu gage tingrui teugwang beulak. 18 Magade Egypt leuhme hanglu mecai, iciu cai penui tingrui ngau gailak. Paiki Ngyi de hanglwe mneilu kemakme de RAMPAUBE rapiage le heleuhdung de ketang zie. 19 Aide Egyptme ziemne saja ge zie nah heleuh pelane Paiki Ngyi ga hanglwe mneilu kemakme ziemne saja ge da. 20 Dede cipau benai, hekwendung gu nteidung rang zie, "RAMPAUBE dage keumpet ntsam lu," nah lidung de RAMPAUBE kiga ratakbam dwaga de hekwakdung nzwa di zie. 21 Kedanemene Jerusalem nah Judah ga libung pelane reugwame reu RAMPAUBE dage keumpet ntsam zie nah mikeheibe reca teugwang kelame penui dade tyei nah penui da helum zie. Cipau benai helila ketei Canaanme reugwame reu RAMPAUBE kiga bamsi tadi zie.