1 Heriak tingrui tingdau RAMPAUBE dade tingrui kielu,

rahangdung tei kegai RAMPAUBE,

nah pa tingrui mileune de peula

nah luh ga giniadung reu ga rui gaibeu la.

2 Mina mamiedung kenret rangbeu la; rekame kenretpe ngau la;

penui mide kecwa hemang rangbeu la nah kemrwa lungciep peu la,

cine minadung meurün nzwa huirwa ladi nah keherei di kedanemene meurün kekwabe gah kecune.*

3 "Meurün kekwamedung reuga a lunghop bamla; cide au hemeuseudung, muiteumedung, Ih saja peugai kerame. Reugwame reu RAMPAUBE Judah kauhau maa ga lazie, nah penuide hereu ketei ga pe hereukwendung nzwa tei zie! 4 Judah dade kimiaktsube pet zie; pe dade paiki teu kegim tie pet zie; pe dade hereu lakpi gwang zie; pe dade hegwangme leune gwang ncüt luzie. 5 Penui au reugwame penui ngauraume de hereu ketei ga lampui niaksai gage cai kedui kegaime nzwa zie; penui hereu tei zie, kedanemene penui da RAMPAUBE lalu, nah hereukwendung teu kelame de keu hengam tei zie. 6 Ih Judahme de tei ngking beu zie nah Joseph leuhme de kelibeu zie; Ih penuide peu lunghyi dailu zie nah penuide ngaunggia beu zie. Penuide Ih madaude lang gidi kemak nzwa dizie, kedanemene Ih RAMPAUBE penui Tinggwang, nah Ih penui kekie teibeu zie. 7 Pecai Ephraim leuhme reugwame ge nzwalu zie, nah penui mlung au zau kesakme nzwa penui sui yizie; penui namedung aide ngau eh penui sui yizie. A da penui sui yila zie!

8 Ih penuide qu gai zie nah penuide hekwalu zie, kedanemene Ih penuide kelibeu zie, nah penuide ndaa nzwa tei ngkiee süt beuzie! 9 Ih penuide heleuhdung dage teizang gaidi, dede penui acu heni kemdeidung gade nsunglu zie, cine penui nah penui namedung ringlu zie nah cailigwang dailu zie. 10 Ih penuide Egyptme deu gade kelibeu zie nah Assyria gade penuide teugwang hekwa luzie. Ih penuide Gilead nah Lebanon deu gage ngngwa gwang gai beu zie penui ziemne heni puidi kemaktane. 11 Ih penui rei jaaidi gade kahgwang zie; Ih jaaidi ga dui nswak kebam de kedeu gai zie na Nile kecok de tei cang dizie. Ngang kela Assyriame de tei hena dizie, nah Egyptme hegwang tuitie de penui dade tetdi zie. 12 Ih a kengking teu penuide tei ngking beuzie, nah penui a zi gade tet zie, aide RAMPAUBE ne ndugai."