1 Darius hegwang tei kelu mmi mdai bekum, Kislev gu lang mdai ne benai (cide au kei hekui bekei), RAMPAUBE sam Zechariah da gwang. 2 Bethel minadung RAMPAUBE de peu penui kekie teibeu kerane Sharezer nah Regem-Melek nah penui minadung de langgai. 3 Penui reugwame reu RAMPAUBE ki ga kebam cingkumedung nah caihakecimedung de resiu; penui rang eh, "Kei mengei bekei Ih mmwang eh hap zie ni, mmi kekiee ge ainzwa tei hang kela nzwa?"*

4 Cine reugwame reu RAMPAUBE sam a da gwang eh ranggai,

5 "Judah deudi ga minadung pelane nah cingkumedung de resiulu nah aide ranglu, ‘Mmi riakhena ge ziemne nang kei mengei nah kei hena bekei dau mmwang nah hap kegai de, nang a ziemne mmwang kesang bam ni? 6 Nang tyei nah sak kecudau, nang n katei n ziemne tyei nah sak meni? 7 Sam aidungde RAMPAUBE ne caihakecime tei kegwangme mui gade rang kebeu sam de de meni, nang Jerusalem nah twagwa kebam namdidung nah Negev, nah naimiak kenlütle ga hangdeutu pi ga lunghyi eh lungh kebam dau?’" 8 RAMPAUBE sam Zechariah da gwang eh ranggai, 9 "Reugwame reu RAMPAUBE aide rangla, ‘Kemzuibe teu eh tiak lu, samkak kelu kesamsangbe, nah ngaugiabe. Hangge ge de peu pe sinabe dade henalu nah ngaungia bamlu. 10 Hemipui nah nggiana, sangme, nah kegame, de tei keherei so, nah nnui hangge gede tei rezam kera nnui mlung gade riem so.’ 11 Dede penui penui lung kai kera mlai di nah penui lung tak bam di. Penui kingnei kelak ne penui penui kwen nket pung di. 12 Penui reugwame reu RAMPAUBE zai mede pe samdung kingnei kelak ne penui penui lung tsurakang nzwa tei taklu. Pa ndaa sam aidungde minadung dage pe Rabe gade, caihakecime dade langgai. Dede minadung kingnei kera mlai di, cine reugwame reu RAMPAUBE penuide pe ratasüt di. 13 Pa qu gai kecudau, penui kingnei beu tadi. Ci siakte eh," Reugwame reu RAMPAUBE ranggai, "Penui acu qu zie, dede Ih kingnei lak. 14 Rahang ge le Ih penuide penui ngau kemak heleuhdung dage tei zangra dizie, nah hangdeu cika migede lungh tadi zie. Migede hangdeu cikade tet kah mede cika cailigwang tadi zie kedanemene penui penui gu hangdeu keyi de hangdeu kemta ge tei kedine."