1 Pecai RAMPAUBE acu cingku kedibe Joshua RAMPAUBE tinggimgwabe dwaga sap kebam keulia gai nah Satan pe zetle pecu mmau gai kera sap bam. 2 RAMPAUBE tinggimgwabe Satan dage ranggai, "Peu RAMPAUBE de ncu kesiu gai, Satan; peu RAMPAUBE, Jerusalem de kedet kelube de, ncu kesiu gai! Mina aide tsingtie ge mi gade teu mpet kelu nzwa meni?"✝ 3 Joshua tinggimgwabe dwaga penia keheradung teu delwe sap bam. 4 Tinggimgwabe pedwa ga sap kebammedung dage ranggai, "Penia keheradung de ra di." Pecai pa Joshua dage ranggai, "Pielo! Ih n maudung n dade keugi dida nah mania keyi gele Ih ncu ba beuzie." 5 Pecai Ih ranggai, "Penuide de peu pe peu gage peuzui kemci ge kaibeu!" Cine penui Joshua peu gage peuzui kemci ge kaibeu nah mania mci kecube ge peu teulu, RAMPAUBE tinggimgwame petai ga sap kebam tingdau.

6 Pecai RAMPAUBE tinggimgwabe Joshua da aja kai nah rang, 7 "Reugwame reu RAMPAUBE aide rangla:

Nang a lampuidung ga pwalu cai, nah a ajadung de mzailu cai,

nang a ki pie rengei nah kekwabe tei zie,

kedanemene Ih ncu peu tet zie nah a dwa sap kebammedung kakga peu gwang zie.

8 Kingneilu, cingku kedibe Joshua, nang nah n kangzangme cingkume ncu ngngwa lungh kebamme!

Kedanemene mina aidungde marengei ge, Ih a kilabe de teu cuhlu zie, Pekiakbe de qu kelabe de.

9 Cu Ih Joshua dwa gage tangtsu kai pwa kebam de pie gailo. Miak hena ge aipau tangtsu ge ga bam,

nah Ih ma ge raugai zie, aide Reugwame reu RAMPAUBE ne ndugai,

nah langnai ge gage Ih hangdeu aikade kemau keugi dizie.

10 Cipau benai*, aide Reugwame reu RAMPAUBE ne ndugai, mipei hangge ge kecu pe kubebang nah nzüttsibang kangga ntum lulo de pe kidabe de qu zie."