1 N kikamdung ngkei gailo, Lebanon, cinzwa eh mi le nnui gu cedar bangdung ru ngkap di kera!

2 Hei eh haplu, cypress bangdung, kedanemene cedar bangdung kau kedine! Dai yi bi cidungde ngkap kwa dida!

Hei eh haplu, Bashan ga mhu bangdung, kedanemene hegung kedige kau kedine.

3 Meurün kekwame hei eh hap, kedanemene penui kemdu ngkap kedine!

Hinghodung mra gai, kedanemene Jordan Langkam Reuki hegie kelade ngkap kedine!

4 Aide a RAMPAUBE Tinggwang ne ranggai, "Meurün kekwabe nzwa, meurün hau daptsetdi kera kai pwa kebam maa pie regum lo! 5 (Penuide lui nah daptset kecume de au saja peu ma, nah penuide zwa kegaime, ‘RAMPAUBE de twa! Ih au hei dida!’ de eh rangla kedanemene meurün hau mpaume ziemne heta tei kelame meurün kekwamedung meurünnadung de nggia la kemakne.) 6 Ih kideu ga migede de ngau nggia si lakta!, aide RAMPAUBE ne ndugai. Pielo! Ih ne peu mina hangge ge kecude pe kidame nah pe hegwangpei ba gage kai dizie, nah penui ne kideu de tei msia dizie nah Ih migede de penui ba gade kelibeu lak." 7 Cine meurün kezwame nah keluime ne daptsetdi lai eh kebam meurün hau ziemne Ih kekwabe teilu. Ih hetuitie kena keulu; ket de, "Kengha" nah keda de, "Ket ketei" lie eh qu. Ainzwa eh Ih meurün hau de kwa. 8 Kei ge gage Ih kemau meurün kekwabe hangcum de tei ngkap di. Ih penui dade a lung dui di, nah penuide acu ngkau di. 9 Pecai Ih pe mpaume dade ranggai, "Ih nnui meurün kekwabe tei si lak ta. Meurün tsai lai eh kebambedung, penuide peu tsai di; tei ngkap kebam meuründung de, peu penuide ngkapti. Bang kebeube meuründung de peu penui hangge gede pe kidabe teih de tyeilu." 10 Cine Ih "Kengha" tuitie de keulu nah a leuhme da samkak kelude tei nggah di kerane cide tei cum di. 11 Cipau benai samkak kelu de teipang di, nah meurün kezwame nah keluime nah acu pie kebamme RAMPAUBE ne ranggai lie kecu cilu. 12 Ih penuide ranggai, "Nnui neula cai, acu a ziehi peulo. Dede nnui neu mecai, a ziehi peu so." Cine penui a ziehi teibeu, rangkanggeu camrei.✝ 13 Pecai RAMPAUBE a dage ranggai, "Rangkanggeu cide mabam kibung gage kaidi lu, pemi keyi penui ncu peu kebeu de!" Cine Ih rangkanggeu camrei de keulu nah RAMPAUBE kerecaki mabam gage kaidi.✝ 14 Pecai a tuitie pe kenabe de teicum di, "Ket ketei," Judah nah Israel ket ketei de teipang di.

15 RAMPAUBE a dage ranggai, "Kemie meurün kekwabe niadung mie n katei n ziemne keu dai lulo, 16 kedanemene pielo, Ih meurün kekwabe ge de kideu gage kaibeu zie. Pa au ngkap kebam meuründung maa pie regum beu lak. Pa gah kedi meurün de mie peei lak, nah pe pi sia kedi meurün de tei ngkei beu lak. Pelui keyi meuründung de matyei kera peu lak, dede meurün catube teih tyei nah penui nginglwakdung teipang dizie.

17 Pemikegah meurünkekwabe kauhau de gidi kelabe da keherei gwang zieda!

Peu kingtie de pe ba nah pe zetle miak gwang tei dilu!

Peu pe ba tsai di nah pe zetle miak cietdi lu!"