1 Pecai Ih nreugwang nah a miak ngang cuh gai nah bagidung mdai lamlwatu kena kakgade gwang kela Ih ngau; nah lamlwatu kena de hetageu gele tei pwabam. 2 Bagi raitube de hekwen kegiedung ge ne ngngwa la, bagi pe kenabe de hekwen ketiakdung ge ne ngngwa la, 3 bagi pe kecumbe de hekwen kehadung ge ne ngngwa la, nah bagi pe mdaibe de puu eh pedau keteibe de ngngwa la.* 4 Cine Ih keligai nah acu resiu kebam tinggimgwabe dage ranggai, "Aidungde daino, a mpaubo?" 5 Tinggimgwabe acu keligai nah ada ranggai, "Aidungde au kideu pelane gu RAMPAUBE dwaga penui sap kebam ni gade mpet kela tinggim tingkai mdai. 6 Hekwen ketiakdung ne ngngwa kela de tingtünle deudi gage tetkai bam; hekwen kehadung de naimiak kenlütle deudi gage tetkai bam; nah hekwen puu eh kedau kecubedung tingbangle deudi gage tetkai bam." 7 Hekwen kengking aidung tetpet nah peei kera mie nah kideu reu ga rwa neu di, cine tinggimgwabe ranggai, "Miecu nah kideu reu rwa cu!" nah penui mie eh kideube de mcetpie gwang. 8 Ge pa acu qu gai nah acu resiu nah ranggai, "Tingtünle deudi gage tetkai kebamdung de pielo; penui a rabe de lungciep peu zie."

9 Cine RAMPAUBE sam a da gwang, rang eh, 10 "Langgi kedimedung dade makai keu lulo, Heldai, Tobijah, nah Jedaiah dade, nah aipaunai gage mie cu nah cide Zephaniah napei Josiah ki gage keu mie lo, Babylon gade gwang kelabe da. 11 Pecai rangkanggeu nah kecak keulu, hegwang peurwa teilu nah Jehozadak napei cingku kedibe Joshua peu gage cwa gailu. 12 Pecu resiu gai nah rangbeu lu, ‘Reugwame reu RAMPAUBE aide rangbam:

Mipei aide, pe zi au Pekiak! Pa kebam gade lungh cuh zie

nah ciciulu de RAMPAUBE kerecaki teilu zie!✝

13 Pa ne RAMPAUBE kerecaki de tei zie, nah pecu hegwangme gu hezukeyi le bah luzie, nah bamlu zie nah pe hegwangram teu zie.

Pa au pe hegwangram gade cingku ge zie, nah pa ne hangna kakga kezuyi puisau ge tei zie.✝ 14 Heldai, Tobijah, Jedaiah, nah Zephaniah napei Hen, penuide kensung gade RAMPAUBE gu kerecaki gade hegwangpeurwa peu zie. 15 Pecai kemdei ga kelame RAMPAUBE kerecaki gwang tei zie, cinzwa eh Reugwame reu RAMPAUBE ne acu lang kegai de nang ci luzie; kedanemene nang RAMPAUBE n Tinggwang kwa kingnei sünne gai cai aide tei luzie!’"