1 Pecai Ih nreu gwang nah a miak ngang piegai, nah ainie, laisiudum ge lim kela, Ih ngau! 2 Tinggimgwabe a dage ranggai, "Nang daipai ngau zeu no?" Ih keligai, "Laisiudum ge lim kela Ih ngau, petie cubit ngkai nah pedi cubit kerei." 3 Pecai pa a dage ranggai, "Laisiudum de ga deudi pelane reuga gwang kera reset de rauteu la. Kedanemene ket lambie rang kela ria gade keregame leune de keugi dizie, nah keheibede kenret sampetdung tei kelame de keda lambie rang pwa kebam ria gade keugi dizie.* 4 Ih reset aide lang mpet gai zie, aide Reugwame reu RAMPAUBE ne ndugai, cine cide keregame ki nah a zi teu kenret sampetdung tei kelame ki ga nlüt zie. Cide pe kiga bam dizie nah pe tsingdung nah tangtsudung ngkap dizie."

5 Pecai acu resiu kebam tinggimgwabe mpet nah ada ranggai, "N miak ngang cuhlu nah pielo dai gwangla bi!" 6 Ih keteugai, "Cide daino?" Pa keligai, "Aide au ciu mdet kera biaktui ge, nah cide au hangdeu pelane ga mina leune mau le pui bam." 7 Pecai biaktui gum hegeu le teikelube keu mpet gai nah cika mipui ge pelung ga ntum bam! 8 Tinggimgwabe ranggai, "Aide au makesia!" Pa pecu biaktui lung gage keling nlwet gai dai, nah pa pegum de keling pwa ngkei kebam de gumdi. 9 Ih ngang cuh piegai nah mipui hangna a taiga gwang kela Ih ngau, nah tingkai penai hesiu ga bam, kedanemene penai hesiu kebamde duirui hesiu nzwa. Penai biaktui de kideu nah tinggim kakga pwa cuh lu. 10 Cine acu resiu kebam tinggimgwabe dage Ih keteugai, "Penai biaktui de dai gage keu mie di launo?" 11 Pa a dage rang, "Biaktui de ziemne Shinar* deu gage kerecaki ge tei kera, ciu eh kerecaki de teicang keludau, cide ga biaktui kaikera singkam telei pwakebam ga kai luzie."