1 Aide RAMPAUBE ne Israelme ziemne ndu kegai sam, RAMPAUBE ne ndugai, tinggimdung teu mtie kelube nah kideube dam kegaibe, mina de rabe pwa kepeube, 2 "Pielo, Ih Jerusalem de hepiak ge gage tei gai dilai eh zeu twagwakebam minadung de peu tet nkoi zie. Cide au Jerusalem de ketang eh twagwa kedi nzwa eh Judah namdi de liede cide nzwa teizie. 3 Cipau benai, Ih mina pelane ziemne Jerusalem de tangtsu rütsüt kecuge tei dizie. Keheibe de cipau tangtsu de pwa kera tei cube pekatei pecu rezam msia sütdi zie, nah kideu ga heleuhdung pelane cipau namdibe de renia zie.* 4 Cipau benai, aide RAMPAUBE ne ndugai, Ih hekwen pelane de keheu eh kemeu dizie nah teu kelame de tei mang dizie. Judahme kigade Ih a miak ngkei zie, dede minadung gu kwendung penui pelane miak Ih tei cietdi zie. 5 Ciu eh Judah muiteume penui mlungdung gade rang zie, ‘Jerusalem ga kelunghmedung anui kengking da, kedanemene RAMPAUBE, penui Tinggwang ziemne.’ 6 Cipau benai Ih Judah muiteume de hetsing kakga mibung ge tei dizie nah meibui sap kebam kakga miheu kebaabung nzwa tei dizie, kedanemene penui zetle nah penui hile twagwakebam minadung de mnwa pwadi zielu. Jerusalem pekatei pebam gade lungh dai zie." 7 RAMPAUBE Judahme paikidung de keli rai beuzie, ciu eh David leuhme nah Jerusalem ga lungh kebamme herüt de Judahme leune swa de diki dilak. 8 Cipau benai RAMPAUBE Jerusalem ga lungh kebamme de gumbeu zie, nah cipau benai caugamme nnei labi cipaume David nzwa dizie, ciciu eh David ki de Tinggwang nzwa dizie, penui dwa gade RAMPAUBE tinggimgwame nzwa dizie. 9 "Cipau benai Jerusalem de renia kera heleuhdung kegwang pelane de tei ngkap dizie.

10 Dede Ih ngaugia rabe rui gai zie nah David leuhme nah Jerusalem ga lunghkebamme dade kengha kie zie, ciciu eh penui acu pie zie, penui ne reutset kedibe de. Penui a ziemne hap zie, mige pena pumli ziemne kehap nzwa; penui penui sui siasütdi eh hap dizie mige pena mipeina mna raitube tsai eh hap kecu nzwa zie. 11 Cipau benai Jerusalem hap kegai de Hadad Rimmon ga Megiddo langkie gade hap kegai nzwa dizie.✝ 12 Hangdeu de hap dizie, pautsa ketket kecu kedabe pautsame gade teuntsam dizie. David kilung gade kepet pautsame de teuntsam dizie nah penui naudung mipeidung dade teuntsam dizie. Nathan kilung gade kepet pautsame de teuntsam dizie nah penui naudung de mipeidung dade teuntsam dizie. 13 Levi kilung gade kepet pautsame de teuntsam dizie nah penui naudung de mipeidung dade teuntsam dizie. Shimei pautsame de teuntsam dizie nah penui naudung de mipeidung dade teuntsam dizie. 14 Pautsamedung gade pautsa kebangdung leune gade, pautsame ketket kecu teuntsam dizie nah penaudung mipeidung dade teuntsam dizie."