1 "Cipau benai duilet ge David leuhme nah Jerusalem ga kelunghme ziemne ngkei pwapeu zie, penuide kemaudung nah mcikemak gade teimci beu kerane. 2 Cipau benai, aide RAMPAUBE ne ndugai, Ih hangdeu gade mamiedung gu hezidung de tei nggah dizie nah penuide nsungdai silak. Ih caihakecimedung nah mcikemak rabedung de hangdeu gade keugi dizie. 3 Mi keheibe de cairasam rangbam dai cai, pe pei nah pe pui pecu mna kelube pecu rangzie, ‘Nang ring gailak, kedanemene nang RAMPAUBE zi teu kenret rangkela ne!’ Pecai pe pei nah pe pui pecu mna kelube pa cairasamdung kerang dau pecu reutset zie. 4 Cipau benai caihakecime ketket kecu ngngam dizie pa cairasam rang eh marengei kengau dau. Minadung de cwa kerane, caihakeci aidungde pemai ketei paiheni dung teudai silak. 5 Kedanemene hangge ge kecu rang zie, ‘Ih au kenret caihakecibe ma! Ih au tangdei tadung keteibe, kedanemene hangdeu de a tah dida Ih hena kebam dau gade!’ 6 Magade mige pecu keteu cai, ‘N ba kena kakga rezam pwa kebamde daino?’ nah pa samkeli zie, ‘Ih azangme kigade acu rezam di lie.’"

7 "Kingtie! N katei cuh lu a meurünkekwabe de renia eh,

mina a taiga nna la kelabe,

aide Reugwame reu RAMPAUBE ne ndugai.

Meurünkekwabe de keheu di,

nah kauhaudung tetzang dizie!

Kedanemene Ih a ba kemneimedung de renia cuh zie.

8 Pecai kideu pelane ga ainzwa gwang dizie, aide RAMPAUBE ndugai,

zicum gade zina de teinggah dizie! Cipau minadung de kap eh gah dizie;

zicum gade zige rünne bam zie.

9 Ih cipau pekecumbe de mi gade ngngwa gwangzie

nah rangkanggeu teihemi dai kelu nzwa teihemi zie;

Ih penuide kecak de kedakpie cu nzwa kedak zie.

Penui a zi quzie,

nah Ih penui sam keli eh rangzie,

‘Aide a minadung da!’

nah penui rang zie, ‘RAMPAUBE au a Tinggwang!’"*