1 Pecai Ih a miak ngang cuh piegai nah mi ge pe ba ga kemdet ria keulwe kebam ngau. 2 Ih ranggai, "Nang daiga mie lau no?" Cine pa a dage rang, "Jerusalem pedi nah petie daikiee ge bi mdet lwe cide cilu kerane."✝ 3 Cidau tinggimgwabe acu mpau kecube de tetdi nah tinggimgwame keda ge pecu redau kerane gwang. 4 Tinggimgwabe pekenabe pe dage rang, "Pakmie eh cipau rehang pei de resiu lu; rangbeu lu,

‘Jerusalem au deudi kiriedung gwale lungh dizie

kedanemene mina nah makaune maadung kiee ham kedine.

5 Kedanemene Ih, aide RAMPAUBE ne ndugai, miheu rie le pwane Jerusalem twagwa luzie,

nah Ih namdi lungga de kendube dizie.*

6 Cuhlu! Cuhlu! Tingtünle deu* gade pak dilu, aide RAMPAUBE ne ndugai,

kedanemene tinggimdung gade tingkai mdai nzwa Ih nnuide teizang dida!, Aide RAMPAUBE ne ndugai.

7 Cuhlu! Zion gage pakgai lu, Babylon napuidung de ngngwa lungh kebammedung!’"

8 Kedanemene Reugwame reu RAMPAUBE acu herüt peu kegai cia nah heleuhdung nnui gu süt ketyeime de renia kerane acu langgai,

cine caugamme nnuide tung bi, Tinggwang pie kebam pekumedung de tung!, RAMPAUBE aide tei kedicai, pa ranggai,

9 "Ih penuide renia cuh eh a ba hwa gaizie, nah penui kilabaangme ne penuide ngkap zie."

Cidau Reugwame reu RAMPAUBE ne acu lang kegai nang ci luzie.

10 RAMPAUBE rang, "Suiyi lei tei lu, Zion napui,

kedanemene Ih nnui da gwang eh nnui kakga bam di kerane!, aide RAMPAUBE ne ndugai."*

11 Pecai cipaunai heleuh kekiee ge RAMPAUBE da ncüt luzie. Pa ranggai, "Cidau nnui a mina tei luzie;

kedanemene Ih nnui kakga lungh zie," nah Reugwame reu RAMPAUBE ne acu lang kegai nang cilu zie.

12 Kedanemene RAMPAUBE kemci deu gade pe mapwa kesang ge nzwa Judah de gum luzie.

Nah piage Jerusalem de pekatei peziemne kedet dai luzie.

13 Zing delu, mina leune, RAMPAUBE dwa gade, kedanemene pecu au pe kemci ni gade teu cuh kelune!