1 Sam aide RAMPAUBE Israelme dage rang beulo caihakecibe Malachi dage kaibeu*.

2 "Ih nnuide hungbam la," de RAMPAUBE rang. Dede nnui rang eh, "Nang dainzwa anuide hungbam lano?" "Esau de Jacob sinabe meni?" RAMPAUBE ranggai. "Iciude Ih Jacob de hungdi, 3 dede Esau de Ih ngau ngkaudi. Ih pe lamlwatudung de gidi, nah Ih pe deudung de renaamkang teibeu dida maiseurungdung ziemne."✝ 4 Magade Esau leuhme Edomme de, "Anui namdi de tei ngkap dida, dede anui ngkap kedidung de teidai zie," de rang cai reugwame reu RAMPAUBE anuide ranggai zie, "Penui tei ncuh dai lubui, dede Ih penuide sam nkau dai dizie. Kedame penui de, ‘Deudi ga kemaumedung’ nah ‘RAMPAUBE ne kelungta reset kedi minadung,’ de qu zie. 5 Nkatei nmiak le aide ngau zie, nah nang rang zie, ‘RAMPAUBE au Israel heriedung gwale de kengkieng bam.’"

6 "Pena pe pei de rüt la, nah kilame ge pe mpaube de rütla. Magade Ih, pe pei lie cai, dai ga acu kerüt bam no? Magade Ih pe mpaube cai, daiga acu kehing de bam no?" de eh RAMPAUBE nnui cingkumedung de rang, a zi de mning mla kelame. "Dede nnui rang, ‘Anui dainzwa n zi de mning mla no?’ 7 Taktyei kemta be a recabam gage reca tei kegaine. Dede nnui rang, ‘Anui dainzwa ncu tei msia no?’ Rampaube taktyeibam de kemta lie de rang kecune. 8 Nnui makaunedung pemiakciet kecube reca pwapeu kecudau, cide kesiabe meni? Nnui pepi sia nah pekau yi kemakpe pwapeu kecudau, cide kesiabe meni? Nnui deuceudi de cide pwapeu lu! Pa ncu luulu zieni mede pa nzu teucuh zieni?" de eh reugwame reu RAMPAUBE ranggai. 9 Cu nnui Tinggwang de keteu bamdi, ngaugia de peu nnui da bamlu kerane. Dede reugwame reu RAMPAUBE rang eh cikenzwa reca n ba ga teu eh, pa nnui hangge de teucuh beu zieni? 10 "Oh, magade nnui kak gade hangge kerecaki kiriedung de ngkuilu cai, ciciu de nnui a ratakbam ga mi ntau kegai de kemta teidi kelak ne! Ih nnuide asui meda," de eh reugwame reu RAMPAUBE rang, "nah Ih nnui ba gade reca pwa kepeu be luu lak. 11 Kedanemene tingnaimiak kepet gade nlwet cu kecang a zi heleuhdung kakga ndudie bamzie nah heni pelane ga perimkeyi nah yitube recadung a zi gade reca teizie. Kedanemene a zi heleuhdung kakga ndudie zie," de eh RAMPAUBE ranggai.✝ 12 "Dede nnui Rampaube taktyeibam de herüt peu kemak rang kecudau nnui kemau tei dida, nah pe tsi, pe taktyei, de mning mla dida.✝ 13 Nnui ainzwa eh rang, ‘Dai kenzwa gede leu no,’ nah nnui cide nui kui lwa," de eh reugwame reu RAMPAUBE rang. "Nnui renaamkaune mede pepi kesiabe mede pekauyi kemakpe ada teugwang; nah aide nang n reca delie eh teugwang. Ih aide n ba gade luulu zie ni?" de RAMPAUBE rang. 14 "Peu mide cwa kelabe da reset gwang eh makaune pehau gade peseu kebam nah acu pwapeu zielie sampet kebeu, deliede acu ratak teigai, Rampaube, daige mau di no! Kedanemene Ih kendu hegwangpei," de eh RAMPAUBE rang, "nah a zi de heleuhdung kakga hetwa peu lazie."