1 Cu nnui cingkumedung, sam aide nnui ziemne. 2 "Magade nnui kingnei mecai, nah magade nnui a zi de hetwa peu kera nnui mlung gage kailu mecai," de eh RAMPAUBE rang, "Iciu cai Ih nnui da reset langgai zie, nah nnui samlamdung de Ih reset dizie. Kesang, Ih penuide reset dida, kedanemene nnui a samde nnui mlung gage kai nzeulu kemakne. 3 Pielo, Ih nnui leuhme da a rata gwang lai eh bam dida, nah nnui zudung gage makaune ratak tei kelu teulwe tei zang gai beuzie, nnui hengyidung gu teu, nah pa ncu de si eh keu teu dizie. 4 Ih sam aide nda ge langgai cu nang ci zie, nah a samkak de Levi da bam jüja zie," de eh reugwame reu RAMPAUBE ranggai. 5 "A samkak peda kela de au teilung nah lungciep, nah Ih cidungde pecu ha beu dida; Ih pecu kehing peu dida, nah pa acu hingla, nah pa a zi teu eh sap bam. 6 Kesang rangkeliabe pe mui ga bam, nah magede petau kemakpe pe muileukung gade ngaulu ma. Pa lungciep teu acu ngngwa tetla nah makesangme ge nah pa kekieege de kemau gade teu nreu beu. 7 Kedanemene cingkube maci bam maisia nah minadung pe mui gade rangkeliabe siu maisia, kedanemene pa au reugwame reu RAMPAUBE samgwabe kecune. 8 Dede nnui kesang lampui gade nreu tetti da. Nnui keledeu kekiee gade minadung de peu kemau tei dida hezaibe de herüt peu mene. Nnui Levi samkak kelu de gileu dida," de eh reugwame reu RAMPAUBE ranggai.✝ 9 "Cine Ih liede, nnuide minadung dwa gade pemi kegah nah mi nkau kepungme ge teibeu dida, kedanemene nnui a zaidung de mzailu kemakne, dede iciu meliene rangkelia dungde nzwakap eh rang beuma kecune."

10 Anui pelane pei ket meni? Peibe Tinggwang ket ne anuide damgai meni? Daitei anui ketket sinabe ne kenlum bamlu meno, anui peimedung samkak de tei hera dino?* 11 Judah ga minadung Tinggwang de samkak kelude kainzeulu meda. Israel nah Jerusalem ga hetakesia teidi. Judahme RAMPAUBE kemci ni pa hungkela de tei hera, nah mipeidung mipui hera keda reca kelamedung de nautakdi. 12 Ih kiela peu RAMPAUBE de Jacob paiki gade cide tei kegaime de dang gi dilu, mrak kebamme nah samkeli kebamme*, pa RAMPAUBE de reca teugwang lalie de. 13 Nangde aide teilu: RAMPAUBE recabam de nnui miakduidung ne teipui dida, kedanemene pa cude recadung de nreugwang piema mede luulu ma nnui ba gade. 14 Dede nnui rang, "Daitei RAMPAUBE anui reca luu meno?" Kedanemene RAMPAUBE n nau nnai kakga hena kebamdau ci kebamne, cau dade samsang luma bi, pa samkak kelu gade n kangngwame nah n nau liede. 15 Pa penuide ket teigai meni, pe rabe kesa gade? Iciucai pa daitei nnuide ket teigai no? Kedanemene pa Tinggwang dade pe leuhme peei kelane. Cine nnuikatei nnui rabe ne gumlu, nah nnui nau de kenlum de gah diso nnui henadau de. 16 "Kedanemene Ih kelak cak kecu de nkaula," RAMPAUBE Israelme Tinggwang rang eh, "nah cauge pe paiheni le makesia gumteula bi," de eh RAMPAUBE rang. "Cine nnuikatei nnui rabe ne gumlu nah kenlum de gah diso."

17 Nnui RAMPAUBE de nnui samdung ne tei leu dida. Dede nnui rang eh, "Anui dainzwa pecu tei leudi dino?" Rang eh, "Mileune kesia keteime RAMPAUBE miakngau gade keyime da, nah pa penuide pesuiyi bam," mede "Daiga Tinggwang gu tiakkemzuibe bamno?"