1 Reugwame reu RAMPAUBE keligai, "Pa a ziemne lampui mtei kera, Ih a samgwabe de langgai. Pecai Rampaube, nnui peei kelabe de, cimezing eh pe kerecaki ga gwang zie. Samkak samgwabe nnui suiyi kebam de, pielo, pa gwang zie,"

2 Dede cau ge Rampaube kegwang benai pecu ngngei eh bamlu bui no? Cau ge pa kegwang dau sap lubui no? Kedanemene pa au mi teihemi kelu nzwa nah paiheni keheta sabu nzwa zie.✝ 3 Pa bam eh rangkanggeu de teihemi nah teimci zie, nah pa Levi leuhme de teimci zie. Pa kecak nah rangkanggeu nzwa teihemi zie, nah penui reca petaube RAMPAUBE da teugwang zie.✝ 4 Ciciu lude Judah nah Jerusalem ga minadung recadung de RAMPAUBE pesui luzie, ndaa nzwa, nah paupai tingdau nzwa. 5 "Pecai Ih nnui tutiak kera gwang zie. Ih zette rekame, kemmha ta keteime, kenret zierang keteime, nah hetatei kelame ziehi cwa tyei kelame, hemipui nah nggiana ziuyi cwa tyei kelame, sangme de teu nreudi kelame, nah acu herüt peulu kemakme leune de mmau dizie," de eh RAMPAUBE rang.✝

6 "Cine Ih, RAMPAUBE, li dima; ciziemne nnui, Jacob leuhme, kamtu ga gwangdi mereu. 7 Nnui peime tingdau gade nnui hezaibe gade nreu tet dida nah cide kai mzeu lu meda. Ada caili gwanglu, nah Ih nnui da caili gwang zie," de eh reugwame reu RAMPAUBE rang. "Dede nnui rang eh, ‘Anui dainzwa cailigwang lulai?’ 8 Ih ncu keteu, mige Tinggwang de cwalu zieni? Iciu de nnui anuide cwabam dida. Dede nnui rang eh, ‘Anui dainzwa ncu cwa no?’ Kereizige nah hemaadung kepeu gade. 9 Heleuh pelane, acu cwala kedine, reset le nnuide reset beu dida. 10 Kereizige pelane kerecaki kibung ga teugwang lu, ciciu lude peu a kiga taktyeipwak bamlu kerane, nah cu aide ga acu kedakpie lu," de eh reugwame reu RAMPAUBE rang, "Magade Ih tinggim gu kirie de nnui ngkei beu ma nah samlamdung de nnui da rui gaibeu mecai, cika kibung kemrwa cidung ziemne bamsi tadi kemaktane. 11 Ih nnui meibui teimsia kedime de resiu zie, ciciu lude nnui luh ga mei dungde teimsia dilak kerane. Ngu kube luhdung ga petsi ga dilak," de eh reugwame reu RAMPAUBE rang. 12 "Heleuh pelane nnuide samlampung lie eh quzie, kedanemene nnui deu ga suiyi bam dizie," de eh reugwame reu RAMPAUBE rang.

13 "Nnui aha rangmsia eh la dida," de eh RAMPAUBE rang. "Dede nnui rang eh, ‘Anui anui kakga daige ncu rangmsia no?’ 14 Nnui rangda, ‘Tinggwang tagwa tei kecu kemtage lie. Daipai kemmi ge bamno pa kerangbe mnei kelu gade mede anui suisia eh RAMPAUBE dwaga tet kela de? 15 Cine cu ngang kelame de samlampung lie quzie. Kesiata tei kelame lungh yi kecu rünne lama, dede penui Tinggwang de kedakpie la nah mria tetti lula.’"

16 Ciu eh RAMPAUBE mie hing kelame hang gege de resiu la. RAMPAUBE penui kerang de kingnei nah siula, nah RAMPAUBE mie hing nah pezi de rüt kelame dungde kensung gade laisiukwak ge pedwa gade rau pwabam. 17 "Penui agu dizie," de eh reugwame reu RAMPAUBE rang, "A katei agu hungtu kelabe, Ih teipet kecu benai. Ih penuide ngaunggia zie, pepei pekatei pena de hungla kela nzwa. 18 Ciciu eh pecai liede nnui kesangbe nah kesangkemakpe ci ntsam luzie, Tinggwang de reca kelame nah reca la kemakme de.