जिवनोअ वसन
1 तिया जिवनोअ वसनोअ बाप्तिमेहें, जो पेलरोत ओतो, जो आमू उनाअया, जो आमू सोताहा डोआ वाईं देख्यो, होव! जो आमू वारुंहूंज देख्यो आन आथो वाईं सापलीत पाल्यो. 2 तो जिवन देखाअयो आन आमू तियाहा देख्यो आन तियाआ साक्शी बी आपताहा, आन तुमुहूं तिया अमर जिवनोअ खबर कोताहा, जो आब्हाअरी ओतो आन आमुहूं देखाअयो. 3 जो कि बी आमू देख्योहो आन उनाअयाहा तियाआ खबर तुमुहूं बी आपताहा. याअकाजे के, तुमू बी आमाअरी हेंगात बोणुहूं जोवे; आन आमाअ ए हेंगात आब्हाअरी आन तियाआ बेटाह्हा ईसु ख्रिस्त याअरी होय. 4 आन आमाअ खुसी पुरी ओत जाय तेहें काजे ए गोठी आमू तुमुहूं लेखताहा.
देव उजालो होय.
5 जे खबर आमू तियापोअ रोत उनाअया आन तेज तुमुहूं बी कोताहा ते ए होय के, देव उजालो होय आन तियामेहें जारिक बी आंदारो कायनाहां. 6 जर तियाअरी बैठक होये एहें आपू कोतेय बी, पोन आंदाराम सालतेय, ताहां आपू ठोग होये, आन सत्यापोअ नाहां सालते. 7 पोन, जर तो जेहें कोइत उजालाम सालेहे, तेहें कोइत आपू बी उजालाम सालो, ताहां आपू एकमेकाअरी बैठक मिकतेहे, आन तियाआ बेटुह्हू ईसुउ रक्त आपुहूं, आखा पापोम रोत सोको कोअहे.
8 जर आपू कोहूं के, आमू किज पाप नाहां कोअयू, ताहां सोताआ जिवोह ठोगतेहे आन, आपामेहें सत्य कायनाहां. 9 जर आपू आपाअ पापोहों देवोअ हुंबर कबुल कोअहूं, ताहां तो आपाअ पाप माफ कोइलो आन आपुहूं आखा खाराब कामोम रोत सोको कोइलोअ काजे इमानदार आन धर्मी होय. 10 जर आपू कोहूं के, आमू ते पाप नाहां कोअयू, ताहां आपू देवोहो लबाड़ ठरवीइतेहे, आन तियाआ वसन आपामेहें कायनाहां.