1 मेराला पाव्हीइला, ओमे आंय तुमुहूं ओं दुसरो पत्र लेखोहो, यां बेनू पत्रामेहें आंय तुमुहूं ओर कोआड़तीज सोका विसार आन तुमाआं मोनोमेहें जागाड़ोहो. 2 याअ कोअते के पवित्र भविश्यवक्तां पेलुज रोत जे गोठी कोयीही ते, आन आपाआ प्रभु आन तारनाराआ आदेश जो तुमाआं प्रेशितों कोत आप्युहू तो तुमू ओर मिकुहूं जोवे. 3 ✝आखाआ पेल, तुमू ओं जांइत ल्या के आखरीइ दिहोमेहें डाणवींइनारे माअहें आवे, तें लालसोम आबजीत जाय, 4 आन ते फुसे, "तियाआ आविलोअ वायदो खोतो पुरो ओवो? काहाके आपाआ डायहां मोइत गोया, पोन धरती बोण्यीहीं तोयोंअ रोत ओंमे जाआं पेल सालेहे तेहेंज कोइत सालू होय." 5 ✝काहाके तें जाईं-जाईंज विहीराअतेहे के पेल देवोअ शब्दावाअहीं जुग पेल रोत बोण्युहूं आन धरती बी पाअयोंम रोत आन पाअयोंवाअहीं कोड़ाअयीही. 6 ✝ तिहींज वाईं तोम तिया वाडोमेऱ्यीइ दुन्या पाअयोंमेहें बुडीत आरवात गोयी. 7 पोन ओमेएं जुगेन धरती याहां देवे तियाज शब्दावाअहीं आगीम टाकीइलोअ काजे राखित मिक्येहे, आन एं न्यायनिवाड़ाआ आन विणभक्त्या माअहोंअ काजे तो दिही आवे ताअहूं जाआं एहेंज कोइत राखित मिक्येहे.

8 ✝पोन माआं मेराला, एक गोठ मा विहीराअहा के, देवोअ नजरेमेहें एक दिही हाजार दिहोअ होस होय आन हाजार वोरह्ये एका दिहोअ होस होय.

9 प्रभु तियाआ वायदाअ बाप्तिम वाआ नाहां लागाड़तू, जेहेंकोइत थोड़ेक माअहें समजीइतेहे; पोन तुमाआं बाप्तिमेहें धिर तोअहे, आन कोडो आरवात जाय एहलिही तियाआ इश्शा नाहां, ते आखेज मोन फेरवुंहूं जोवे एहलिही तियाआ इश्शा होय.

10 ✝पोन प्रभुउ दिही बांडोअ होस आवे, तिया दिहोपोअ जुग जुदो तुदड़ीइतोज जातो रोय, तत्वे तोपीत ओगलीत जाय, धरती आन धरतीपोर्‍येए कामे बोलीत जाय*. 11 एहेंकोइत ओं आखो आरवात जानारो होय, ताहां तुमू केहेलेहे रोअहूं जोवे? तुमाआं रोअलोअ पवित्र जोवे आन भक्तीमेहें देवोहो होपाअले माअहें रोअहूं जोवे. 12 तिया देवोअ दिहोअ केहें कोइत वाट जोवुहूं जोवे, आन आपू केतीही कोशित कोअहूं जोवे; जिहींवाईं जुग बोलीत आरवात जाय आन जुगोमेर्‍योअ आखो जास्ती तोपीत ओगलीत जाय. 13 ✝तेबी तियाआ आथवसनोअ परमाणे आपू एक नोवो जुग आन नोवी धरतीइ वाट जोवतेहे जिहीं देवोअ सतीपण रोय.

14 तियाहा कोत मेराला पाव्हीइला, तुमू तिया दिहोअ वाट जोवतेहे, ताहां तुमू तियाआ नजरेमेहें सोके आन निर्दुस आन शांतीम रोनारे जोड़ुहूं जोवे. 15 आन आपाअ प्रभुउ धिरोहो तारण समजा; देवे आपल्यी बुद्दी वापरीत कोइत आपाअ मेरालू पाही पौलुस ये बी तुमुहूं एहेंज कोइत लेख्योहो. 16 आन तिये तियाआ आखा पत्राम यीं गोठीइ बाप्तिम कोत आप्योहो; तियाम थोड़ीक गोठी समजीइलोअ कठीण जाय एहलिही होय, आन आड़ाम्ये आन ईंडीवण्ये माहें जेहलोहो वसनोअ बिहीरो अर्थ काड्तेहे, तेहलोह याअ बी अर्थ काड्तेहे, आन इंहींवाईं तें सोतापोअ नाश हाटवीत लेतेहे.

17 ताहां मेराला पाव्हीइला, ए गोठी तुमुहूं पेल रोत होमजाअहे ताहां सांबालीत रोवा, काहाके पापी माअहुंउं लालसोमेहें आवित तुमू सोताआ हाजू वाटू आथोम रोत मा टाकाअहूं देहा. 18 आपाअ प्रभु आन तारनारा ईसु ख्रिस्ताआ मेरवानीम आन बुद्दीमेहें वादते जावा. तियाआ महिमा ओमे आन कायम ओवती रोअहूं जोवे! आमेन.