1 आपाअ देव आन तारनारु ईसु ख्रिस्ताआ हाजा कामों वाअहीं आमाआं सारका किमती विश्वास मिकनारा माअहुंहूं, ईसु ख्रिस्ताआ सेवक आन प्रेशित शिमोन पेत्राआ तरफ रोत पत्र: 2 देव आन आपाआ प्रभु ईसुउ ओलखाती वाअहीं तुमुहूं मेरवानी आन शांती भारपुर जोड़ुहूं जोवे.

3 काहाके देवे आपुहूं तियाआ महिमा आन भक्तीवाला जिवनोअ काजे हाद्येहे, तियाअरीइ आपाआ ओलखाती वाअहीं तिये सोताआ सेक्तीवाईं आपाआ जिवनोम जोवनारी आखी गोठी आप्यीही. 4 जिहीं वाअहीं खुब वोडे आन जाअखिलेहे महत्वाआ आथवसने तिये आपाआ काजे आप्येहे; तियां वाअहीं तुमू दुन्यामेऱ्यीइ खाराब लालसोवाईं मोनोम आवनारी सोगदायी रोत वासात कोइत देव सोभावोम भागिदार बोणित सेके. 5 यींज गोठीइ काजे तुमू ओवे तेतोहो मेहेंनत कोइत आपाअ विश्वासोम हाजे कामे, हाजा कामोमेहें समजदारी, 6 समजदारीमेहें संयम* आखा संयमोम रोत धिर, धिरोम रोत खोरी भक्ती. 7 तुमाआं खोरी भक्तीम रोत पाव्हीइलापोअ मेर, तियी मेरेपोअ मेर वादाड़ते जावा; 8 काहाके जर ए गुण तुमामेहें ओय, आन वादता जाय, ताहां आपाअ प्रभु ईसु ख्रिस्ताआ ओलखातीमेहें तुमू आलह्ये आन वांज्ये ने ठरनारे, एहलोहो ते तुमुहूं कोई देय. 9 जियामेहें ए गुण कायनाहां तों आंद्लो होय, तियाहा कमी हुजेहे, तों पेल्लाआ तियां सोताआ पापोम रोत सोको ओयोहो तों विहीरात गोयोहो. 10 तियाहाकोत माआं पाव्हीइला, तुमाआं बाप्तिमेऱ्यीइ देवोअ निवड़ आन देवोअ पसंती पाक्की कोइलोअ काजे खास कोशित कोआ. जर एहें कोअहा ताहां तुमू विश्वासोम रोत केदिहीं ने सुटहा. 11 आन तेहेंज कोइत आपाअ प्रभु आन तारनारु ईसु ख्रिस्त याआ जलमजुग्याआ राजोमेहें पुरा हक्का वाअहीं तुमू फोहीत सेकाहा. 12 याआज कोअता तुमुहूं ए गोठी मुंदू बी होय आन तुमुहूं जोड़्योहो तिया सत्याम तुमू मजबुत ओवेहे तेबी तुमुहूं तियांआं कायम ओर कोइत आपीइलाअ आंय कालजी लेहीं. 13 माआं काजे ओं हाजो होय के आंय या तंबामेहें होय ताअहूं जाआं तुमुहूं ईत आपीत जागते मिकीइलाअ माहूं हाजो लागेहे. 14 काहाके माहूं मुंदू होय के आपाअ प्रभु ईसु ख्रिस्ते माहूं कोयोहो तियाअ परमाणे माहूं माआं तंबु वेगुज काडुहूं पोड़े. 15 आन माआं मोतोअ फाटी बी ते गोठी कायम तुमुहूं ईत आवुहूं जोवे, तियाहा कोत आंय जेतोहो जाआं ओवे तेतोहो जाआं कोअहीं.

16 काहाके हुशारी वाअहीं ईतिवल्यी गोठीही पालित आमू आपाअ प्रभु ईसु ख्रिस्ताआ सेक्ती आन फाश्यो आविलोअ एहलिही तुमुहूं कोताहा एहलोहो नाहां; आमू खाजगी आमाआं डोआ वाअहीं ए वोडी गोठी पालनारा एहेलाहा होय. 17 ✝आमू तिहीं ओता जाहां तियाहा देव आब्हाअ जागे रोत मानपान आन महिमा जोड़्यू; ताहां तो आवाज वोडी सेक्ती वाअहीं आयू, तो एहें कोइते के "ओ माआं मेरालू बेटुह्हू होये, या वाअहीं आंय खुस होये." 18 आमू खाजगी ओ आवाज होरगाम रोत आवल्यु ताहां उनाअला, जाहां आमू तियाअरी पवित्र डोगोपोअ ओता.

19 आमापोअ जों भविश्यवक्ताआ वसन होय, तों भर आंदाराम उजेड़ आपेहे, तुमाआं मोनोमेहें दिही उगे ताअहूं आन वेगीइ उजालू तारु उगे ताअहूं तुमू तियापोअ दिहान मिकहा ताहां केतोहो हाजो ओवे. 20 पेल तुमू ओं जांइत ल्या के, वसनोमेऱ्यीइ कोड्ली बी भविश्यवाणी सोताआ मोर्जी वाअहीं पुरी नाहां ओवती; 21 काहाके कोड्ली बी भविश्यवाणी माअहोंअ इश्शा वाअहीं केदिहीं नाहां ओवी, पोन माअहें पवित्र आत्माआं ताबाम ओत कोइत देवोअ तरफ से खबर आपतेते.