1 ईसु ख्रिस्ताआ प्रेशित पेत्राअ वोगेहे रोत जो जें पोन्तुस, गलातीया, कप्‍पदुकिया, आसिया आन बिथुनिया या भागोमेहें परदेसी कोत रोतेहे, तियां देवोअ माअहोंअ काजे ओं पत्र होय.

2 देव बाह्हाआ योजनाआं पुरमाणे तुमू निवड़ाअयेहे, तिये तुमुहूं पवित्र आत्मावाईं सोके कोअयेहे, आन तुमू तियाआ आदेश मानित सालुहूं जोवे, तियाहा कोत प्रभु ईसु ख्रिस्ताआ रक्त तुमापोअ हिपड़्योहो. तुमुहूं मेरवानी आन शांती भारपूर जोड़ुहूं जोवे.

3 आपाआ प्रभु ईसु ख्रिस्ताआ देव बाह्हाआ धन्यवाद! तिये ख्रिस्ताहा मोतोम रोत फाशुउ जिवतु कोइत तियाआ वोडी दया वाअहीं आपुहूं जिवती आशामेहें नोवो जल्म आप्योहो. 4 आन तियावाईं एक हादाफल्योअ, सोको आन अमर मालधनोअ आशिर्वाद होरगामेहें तुमाआं काजे राखित मिक्युहू. 5 आखरीइ दिहोमेहें प्रगट कोइलोअ काजे तियार कोअल्या तिया तारणोअ कोअते देवोअ ताकतो वाअहीं विश्वासो वाअहीं तुमाआं राखवाली ओवीही.

6 पोन ओमें यीज गोठी वाईं थोड़ाक दिही जाआं तुमू जुदी जुदी परिक्शा वाअहीं दुख वेठतेहे तेबी खुस ओवतेहे; 7 ओं याअ कोअता होय, काहाके तुमांआं फारकीइल्यु विश्वास, जो आगी वाअहीं तापासल्या आरवाअनारा होना रोत बी जास्ती कामोअ होय, ईसु ख्रिस्त आवे तियी वेले मान महिमा, स्तुतीइ कारण ओवुहूं जोवे. 8 तुमू तियाहा ने देख्यू तेबी मेर कोअतेहे, आन ओमे ताम विणदेख्येज बी तियापोअ विश्वास कोइत तुमू शब्दाम ने कोत सेकाय एहलिही महिमावाली खुसीवाईं पोआत जातेहे. 9 आन तुमाअ या विश्वासोअ फल मोन्ज्ये आत्माआं तारण तुमू स्विकारतेहे.

10 यी तारणोअ मेरवानीइ बाप्तिमेहें जियां भविश्यवक्तां जे भविश्यवाणी कोअयीते, तियीइ जास्ती होदफुस आन तापास कोअयू. 11 तियांमेऱ्युउ ख्रिस्ताआ आत्मा जेहलाम ख्रिस्ताआ तारास आन तियाआ फासाड़ी ओवनारी महिमाआं साक्शी पेलुज रोत आपतुतो, तेहेलाम तो कोड्ली आन केहली वेलेएहें इशारु कोअतुतो, ए गोठ तियां होदीत काड्यी. 12 देवे तियां भविश्यवक्ताहां देखाड़्योतो के, तियांआं काम सोताआ काजे नाहां, पोन तुमाआं सेवाअ काजेहे ओतो. जे हाजी बातमी तुमुहूं होंबलाड़्यी ते होरगाम रोत मोकलीइल्या पवित्र आत्मा वाअहीं जोड़्यी; आन यीं गोठीहीं देवदुत बी ध्यान लागाड़ीत पालीइलोअ इश्शा कोअताहा.

13 तियाहा काजे तुमू सोताआ मोन तियार कोइत जागते रोवा, ईसु ख्रिस्ताआ प्रगट ओवीइलोअ वेले तुमापोअ जे मेरवानी ओवनारी होय तियीइ पुरी आशा मिका. 14 तुमू देवोअ आदेश माननारे पोऱ्ये बोणा. पेल अजाणेम कोअतेहे तेहलेहे सोताआ लोभ लालसोम मा रोहा. 15 पोन जिये तुमुहूं निवड़्ये तो सोकु होय, तेहलेहे तुमू बी आखी गोठीमेहें सोके बोणा.

16 काहाके वसन एहें कोहे, "सोके बोणा, काहाके आंय सोकु होंव." 17 जो बिगर भेदभाव कोअयेज जिया तियाआ कामोअ पुरमाणे न्यायनिवाड़ु कोअहे, तियाहा जर तुमू, "बा," कोत गोगाड़तेहे, ताहां इंहीं या धरतीपोऱ्याआ जिवनोम तुमू तियाहा बित कोइत वागुहूं जोवे. 18 काहाके तुमाआं सुटका वेगाआ डायहां ठरिवल्या रितीरिवाजो वाअहीं मोन्ज्ये होना-सांदी आन आरवात जानारी वस्तु वाईं नाहां ओवी. 19 पोन निर्दुस आन वाहीं डाग ने एहेलाहा ख्रिस्ताआ जास्ती किमती रक्तावाअहीं तुमाआं सुटका ओवीही. 20 तियाहा ताम दुन्या बोणावीइलोअ पेल रोत देवे नेम्युतो. पोन ओमे यां सेवट्याआ दिहोमेहें तो तुमाआं काजे प्रगट ओवुहू. 21 तुमू जियावाअहीं देवोपोअ विश्वास मिकनारे ओवेहे; तिये देवेज तियाहा मोअल्यामेहें रोत जिवाड़ीत महिमा बी आप्यी, काहाके यावाअहीं तुमाआं विश्वास आन आशा देवोपोअ रोअहूं जोवे.

22 तुमू सत्याआ आदेशोअ पालनो वाईं तुमाआं मोन सोको कोइत लेदोहो, तियाहा कोत एकान बिहीरापोअ पुरा मोनोवाअहीं खोरी मेर कोआ. 23 काहाके मोअनारा बिजोवाअहीं नाहां, पोन अमर बिजोवाअहीं मोन्ज्ये देवोअ जिवता आन अमर शब्दा वाअहीं तुमुहूं नविल जल्म जोड़्योहो. 24 काहाके, देवोअ वसन एहें कोइत कोहे के

"आखे माहें खोड़ोअ होसऱ्येए होय;

आन तियांआं महिमा फुलोअ हारकी होय;

खोड़ उगात जाहे

आन फुल कोमात जाहे;

25 पोन देवोअ वसन अमर होय."

ओंज तों हाजी बातमी वसन होय जों तुमुहूं कोयोहो.