1 तुमामेहें जे डाया होय, आंय तियांआज होस डायु आन ख्रिस्ताआ दुखोअ साक्शी आन देखाअनारी महिमामेहें आरी मिलीत कोइत तियांहां ओं समजाड़ोहो के 2 देवोअ तिया टोलाआ जो तुमाआं विसमेहें होय, तियाआ राखवाली कोआ; आन ओं दाबावो वाअहीं नाहां, पोन देवोअ मोर्जीइ पुरमाणे खुसी वाअहीं, आन विणलाज्यी कामायीइ काजे नाहां, पोन रोडे वाईं कोआ. 3 जे माअहें तुमाआं आथोम होप्येहे, तियांपोअ आधिकार मा सालाड़हा, पोन टोलाआ काजेहे नमुनो बोणा. 4 जेहेलाम वोडू राखवाली प्रगट ओवे, तेहेलाम तुमुहूं महिमाआ टोपू आपे, जो केदिहीं नाहां कोमाअतू.

5 तेहेंज कोइत ए जुवानो! तुमू बी डायहांअ ताबाम रोवा, आन तुमू आखे बोठेज एकमेकाआ सेवा कोइलाआ कोअते तियारीम रोवा, काहाके वसन कोहे, "देव वोडाऱ्या माहुंउं विरोध कोअहे, पोन हानाला माहूंपोअ मेरवानी कोअहे." 6 तियाहा कोत देवोअ ताकतवाला आथोअ निसे हानाले रोवा, ताहां तो तुमुहूं बोराबर वेलेपोअ उसे कोए. 7 तुमाआं आक्खी सिंता तियापोअ टाका, काहाके तियाहा तुमाआं कालजी होय.

8 हेएजा, आन जागते रोजा; काहाके तुमाआं दुस्मोन सैतान ओ घांगरीइनारा सिहांवागोअ होस कोडाहा वेतरीत खांव एहेंकोत होदतु फिरेहे; 9 विश्वासोमेहें मजबुत रोत कोइत, तियाआ विरुद्दाम उबे रोवा, काहाके तुमाआं पाव्हीइले जें दुन्याम होय तें एंहेंज कोइत दुख वेठतेहे. 10 ओमे जिये तुमुहूं ख्रिस्तामेहें तियाआ कायम महिमाआं काजे हाद्येहे तो आखी मेरवानी आपनारु देव होय, तुमाआं थोड़ीक वाआ जाआं दुख वेठीइलाआ फासाड़ी सोताहाज तुमुहूं पाक्के आन मजबुत आन ताकतवाले बोणावे. 11 तियाआज राज पिढ़ीन पिढ़ी रोये. आमेन!

12 आंय सिल्‍वानुसोअ आथे जियाहा आंय इमानदार पाही कोत मानोहो, थोड़ाजमेहें लेखीत तुमुहूं समजाड़्योहो, आन ए साक्शी आप्यीही के देवोअ खोरी मेरवानी एज होय, इंहींजमेहें टिकीत रोवा.

13 जें बाबेलोमेहें तुमाआं हारके निवड़ीइल्ये विश्वासी माअहें तुमुहूं सलाम कोतेहे; आन माअ पोर्‍यू मार्क ओ बी सलाम कोहे.

14 मेरे वाअहीं गले लागाड़ीत एकान बिहीराहा सलाम कोआ. ख्रिस्तामेहें तुमू आखाहा होक जोड़तू रोअहूं जोवे.