1 जेहें कोइत तियां माहूंमेहें ठोग भविश्यवक्ता ओता, तेहेंज कोइत तुमामेहें बी ठोग मास्तर ओवे, ते नुकसानोअ जोगिही खोटी हिकवोण आपे, आन जिये तियांहां वेसाता लेदाहा आन वासाड़्याहा, तिया मालख्योहो ते नाकारे, आन एहें कोइत ते सोताहा वेगाज आरवाइलोअ आफत हाटवीत लेय. 2 तेबी तियांआं लुसड़ायीइ वाटे जाअखिलेहे जोएं साले; तिहींइं वाखरी सत्य मार्गाआ निंदा ओवे.✝2:2 रोम 2:24; यहे 36:22 3 ते लाभोअ कोअता बोणावटी गोठी कोय आन तुमापोअ रोत पोशा कामावे; तियांआं कोअता नेमल्यु डोंड पेलुज रोत वाआ नाहां लागाड़तू, तियांआं आरवाइलोअ वेल वेगीज आवनारी होय;

4 काहाके जियां देवदुतों पाप कोअयू, देवे तियांहां ने सोड़्या; पोन तियांहां नरकाम टाकी देदा आन न्यायनिवाड़ाआ दिहोअ कोअते आंदाराआ कुंडीम बांदीत मिक्याहा; 5 ✝2:5 उत्प 6:1-7; 7:23तिये वेगाआ जमानामेऱ्यीइ दुन्याहां बी ने सोड़्यी, पोन विणभक्त्या माहूंपोअ पाअयोंअ रेल मोकलीत नावासट आरवीत टाक्ये, पोन सतीपणोअ परसार कोअनारु नोहू आन तियाअरी हांत जोएं वासाअये; 6 देवे सदोम आन गोमोरा यां होयरोहों एहेलिही शिक्शा आप्यी के तियांहां आगी वाअहीं नावासट आरवीत टाक्ये आन आगाड़ी जे माहें पापोम जिवे तियांआं कोअते एक नमुनू मिक्यू.✝2:6 उत्प 19:24 7 ✝2:7 उत्प 19:1-16 आन धर्मी माटी लोतोहो पापी माअहोंअ सोगद्ये कामे देखदेखीइ दुखी ओतू, तियाहा सुटका जोड़्यी.✝2:7 उत्प 19:12-15 8 तो धर्मी माटी तियां माहुंउं विसमेहें रोतामेहें तियांआं खाराब कामे देखदेखीइ आन उनाय उनाय, तियाआ धर्मी मोन दिहीन-दिही दुखी ओत जातोतो; 9 धर्मी माअहुंहूं परिक्शामेहें रोत केहें कोइत सोड़वीइलोअ आन पापी माअहुंहूं शिक्शा भोगे तेहें न्यायनिवाड़ाअ दिहोअ कोअता केहें कोइत राखित मिकीइलोअ तों प्रभुहू मुंदू होय.

10 खास कोइत जें सोगद्यी लालसायीइ फाट लागतेहें आन देवोअ आधिकारोहो नाहां मानते, तियांहां केहें कोइत ताबाम मिकिइलो ओं प्रभुहू समजाअहे. तें विणलाज्ये, डांबऱ्ये आन उसा पदोवालाआ निंदा कोइलोम जारिक बी नाहां बिते. 11 तेबी सेक्ती वाअहीं आन ताकते वाअहीं वादार वोडा जे देवदुत होय ते जाआं प्रभुउ सामने यां ठोग मास्तरोंअ निंदा कोइत तियांहां दोशी नाहां ठरवीइता. 12 पोन एं माहें विण ओकल्या जनवारोअ होस होय, जें सोताहा तोआत कोइत नाश आरवाइलोअ कोअतेज उब्ज्येहे; जियीं गोठीइ वाहीं मुंदू कायनाहां तियींइं बाप्तिम तें निंदा कोअतेहे; तें रानठ्या जनवारोअ होस मोअतीज आरवाअनारेहे. 13 बिहीराअ बाक्तो कोअल्याआ बोद्ले तियांआंज बाक्तो ओत जाय, तियांहां दिही-दोवल्येज मोज्या कोइलोअ हाजो गोमत्लो. तें तुमाआं विसमेहें एक डाग जेहें आन विणलाज्ये होय. तें तुमाअरी खातेहेन पितेहे आन सोताआ मस्तीमेहें रंगात मोज्या कोअतेहे. 14 तियांआं डोआम कायम सिनालाअ नजर पोआलीज रोहे; तियांहां पाप कोअया वासी होक नाहां आवतु; तें फोलक्या मोनोवालाहां सापलाम*2:14 सापलाम लालस देखाड़ीत कोइत पाड़तेहे, तियांआं मोनोहों लालस कोइलोअ सवाय पोड़ीत गोयीही, तियांपोअ देवोअ हाराप होय. 15 ✝2:15 गणती 22:4-35 ते हुदी वाटीही सोड़ीत पुलवात गोयेहे आन बौरोअ पोर्‍या बालामोअ होस भटकीत गोयेहे. तियांहां खाराब वाटे पोशा कामाविलोअ हाजो गोम्यो.✝2:15 गणती 22:5-7 16 पोन तियाआ पापोअ विरोध ओवू; मुकी गोदड़ी माहुंउं आवाजोम गोगित भविश्यवक्ताआ फोगाय बंद कोअयी.✝2:16 गणती 22:26-31

17 एं माहें उगाअला कुवा होय आन वादुवाईं उड्नारा वाद्लाआ होस होय; तियांआं काजे देवे जास्ती आंदारावालू जागू राखित मिक्युहू. 18 जें माहें सुकीइ गोठीम सालनारा माहूंम ओमे जात निहींतेहे, तियांहां तें उदड़ीज फोगाय कोअतीज, लोफाट्यी गोठी वाअहीं दुन्यादारीइ गोठीम ठोगी देतेहे. 19 तें तियांहां सुटकाआ वसन ते आपतेहे खोरे, पोन तेंज सोताहा लुसड़्या कामोम बांदात रोयेहे; काहाके जों जिहींम बांदात रोयोहो, तों तियाआ गुलाम होय. 20 जें माहें प्रभु आन तारनारा ईसु ख्रिस्ताहा ओलखीत दुन्याआं घाणीम रोत सुटित गोये, पोन जर तेंज फाशेए वोलीत तियी घाणीम जाते रोये, ताहां तियांआं दशा पेल्लाआ पेक्शा जाअखी खाराब ओत जाहे. 21 काहाके तियां ए हुदी वाट जाइंत बी देवोअ पवित्र आदेशोअ वोलेहे सोब मुउड़ीत लेदी, जो आदेश तियांहां होप्युतो, तेताआ वोतीइ जी तियांहां ते गोठ ने मुंदू जाती तों जाआं तियांआं काजे हाजो रोतो. 22 ✝2:22 निती 26:11"हुंणो तियाआ ओकारीइ वोल जात्लो" आन "उंगलावल्यी भुंडड़ी फाशीइ वोलीत पाणखायाम ओंअडी जात्ली," कोतेहे तेहलिही काईं तियांआं काजे बोराबर होय.