1 पौलुस, सिल्‍वानुस आन तिमथ्याआ जागेहे रोत थेस्सलनी मेऱ्यीइ मंडड़ीइ नावसे, जे आपाअ देव बाह्हू आन प्रभु ईसु ख्रिस्तामेहें होय: 2 आपाअ देव बाह्हू आन प्रभु ईसु ख्रिस्ताआ जागेहे रोत तुमुहूं मेरवानी आन होक मिलतू रोय.

3 आमाआं पाव्हीइला, तुमाअ बाप्तिमेहें आमू सादा देवोअ धन्यवाद कोअहूं जोवे, आन ओं बोराबर बी होय, याअ काजे के तुमाअ विश्वास खुब वादतू जाहे, आन तुमा आखाआ मेर एकान बिहीरा पोअ जास्तीज वादती जाहे. 4 तिहीं वाईं आमू सोताहा देवोअ मंडड़ी मेहें तुमाअ बाप्तिमेहें वोडाय कोअताहा, काहाके जेतू बी विरोध आन तारास तुमू वेठतेहे, तियां आखामेहें तुमाअ धिर आन विश्वास देखाअहे.

5 ओ देवोअ खोरा न्यायोअ पुरावू होय, के तुमू देवोअ राज्याआ लायकीइ बोणुहूं जोवे, जियाअ कोअते तुमू आखे दुख बी वेठतेहे. 6 काहाके देव जो ठीक ओय तोज कोए: जें तुमुहूं तारास देतेहे, तियाआ बोदले तो तियांहां तारास आपे. 7 आन तुमू जें तारास वेठतेहे, तो तुमुहूं आमाअरी आराम आपे; तो ओं तियी वेले कोए जेहेलाम प्रभु ईसु तियाआ ताकतवाला दुतोंअरी, आगीइ हांगाड़ाम होरगाम रोत प्रगट ओवे. 8 आन जियां माअहूं देवोहो नाकार्‍यू, आन जें आपाअ प्रभु ईसुउ हाजी बातमीहीं नाहां मानते तियांहां डोंड आपे.

9 तें हादाफल्योअ आरवाइलोअ डोंड वेठे, प्रभुउ सामने आन तियाआ महिमावाली सेक्तीइ उजवडे रोत सेटे ओत जाय. 10 ओं तियां दिहों मेहें ओवे, जेहेलाम तो तियाआ पवित्र माअहूं मेहें महिमा मिलवु आवे आन आखा विश्वास कोअनारा मेहें बोगलाइलाअ गोठीइ काजे आवे, तियां मेहें तुमू बी रोहा, काहाके तुमू आमाअ साक्शी पोअ विश्वास कोअयू.

11 तियाहाज काजे आमू तुमाअ कोअते हादाफल प्रार्थना बी कोअताहा. आमू आपाअ देवोहो कोताहा के तिये तुमुहूं लायकीइ जिवन जिवे तेहें काजे हाद्येहे, आन तो तुमाआं हाजी गोठीइ हारेक इश्शा आन विश्वासोअ हारेक कामोंहों तियाआ सेक्ती वाईं पुरो कोअहूं जोवे. 12 एहें कोइत आपाअ देव आन प्रभु ईसु ख्रिस्त यांआं मेरवानी वाईं आपाआ प्रभु ईसु ख्रिस्ताआ नावोहो तुमामेहें आन तुमुहूं तियामेहें महिमा जोड़े.