1 पोन विश्वासी पाव्हीइला, वेल आन वाडोअ बाप्तिम तुमुहूं लेखीइलोअ कीज गरज कायनाहां. 2 काहाके तुमू सोताहाज वारुहूं जांअतेहे के, जेहें कोइत बांड राती होल्याज आवेहे, तेहेंज कोइत प्रभुउ दिही बी आवनारु होय. 3 जेहेलाम माअहें कोय, "होक होय, आन हाजे हुतेहे होय," ताहां जेहें कोइत पोटाअरीइ बायी पोअ तारास आवेहे, तेहें कोइत उसकाहीज तियां पोअ नाश आवित पोड़े; आन किबी कोइत बी तें वासाअनारे कायने.

4 पोन विश्वासी दोस्तां, तो दिही तुमा पोअ होल्याज बांडोअ होस आवित पोड़े एहेलेहे तुमू आंदाराम कायनाहां. 5 तुमू आखे उजालाअ पोर्‍ये आन दिहोअ पोर्‍ये होय. आपू नाहां रातीइ होय, नाहां आंदाराआ. 6 तियाहा काजे आपू बिहीराअ होस हुवते ने रोअहूं जोवे, पोन जागते आन तियारीम रोअहूं जोवे. 7 काहाके जे हुवतेहे ते रातीज हुवतेहे, आन जे साकवाले रोतेहे तें रातीज साकवाल रोतेहे. 8 पोन आपू जे दिहोअ होय, तियाहा काजे विण साकवाल रोअहूं जोवे. आवा विश्वास आन मेरेए आंगड़ो पेवित कोइत आन तारणोओं आशाआ टोपू पेवित रोहूं.

9 काहाके देवे आपुहूं तियाआ खोतेए काजे नाहां, पोन याअ काजे ठरव्येहे के आपुहूं आपाआ प्रभु ईसु ख्रिस्ता वाअहीं तारण जोड़ुहूं जोवे.

10 तो आपाआ काजे एताआ वोतीइ मोयु के आपू जिवते रोंव नेत मोइत जांव, तेबी आखे मिलीत तियाअरीज जिवते रोत सेको. 11 आन एकान बिहीराहा उत्साहीत कोआ आन एकान बिहीराहा मदत कोआ, जेहलोहो तुमू ओमे बी कोअयाज कोअतेहे.

12 माअ पाव्हीइला, आमू तुमुहूं रावणी कोअताहा के जे तुमाअरी मेहेंनत कोअतेहे, आन ख्रिस्तामेहें तुमुहूं वाट देखाड़तेहे, आन जे तुमुहूं सिकाड़तेहे, तियांआं मानपान कोआ. 13 आन तियांआं कामोअ वाखरी तियांअरी मेरेवाईं तियांआं मानपान कोआ. आन सोताहा आखाअरी होकेहे रोवा.

14 ए पाव्हीइला, आमू तुमुहूं रावणी कोअताहा, के जे आलहाय कोअतेहे तियांहां समजाड़ी द्या, थतरीइनाराहां धिर आपा, कमजोरोहो मदत कोआ, आखाअरी धिर खेटीत रोवा. 15 ओं ध्यानम मिका! कोडो कोडाआ सुकीइ बोदले सुक ने कोअहूं जोवे; पोन हादाफल एकान एकाआ हाजो कोइलाआ उद्देश मिका, एकान बिहीराअरी आन आखा माहुंउं बी हाजो कोइलोअ कोशित कोआ.

16 हादाफल खुसीम रोवा. 17 कायम प्रार्थना कोआ. 18 आखी परिस्थिती मेहें देवोअ धन्यवाद कोआ; काहाके ख्रिस्त ईसु मेहें देवोहो ओंज जोवेहे.

19 पवित्र आत्माहां मा उलवाहा. 20 भविश्यवाणीहीं कमी मा समजाहा. 21 आखी गोठीही फारका; जे हाजी होय ते तोइत रोवा. 22 आखी जातीइ खाराबीम रोत सेटे रोवा.

23 होक आपनारु देव सोताहाज तुमुहूं हारेपुरे सोके कोए; आन तुमाअ आत्मा आन जिव आन शरीर आपाअ प्रभु ईसु ख्रिस्त आवे ताअहूं जाआं निर्दुस आन सांबालित मिकुहूं जोवे. 24 तुमाअ हादनारु इमानदार होय, आन तो ओं कोएज.

25 पाव्हीइला, आमाअ काजे प्रार्थना कोआ.

26 आखा विश्वास्याहां सोकी गुट लेत सलाम कोआ.

27 आंय तुमुहूं प्रभुउ आधिकारो वाअहीं रावणी कोअहो, के ओं पत्र आखा विश्वासी माहुंहूं जोरे आवाजोम वासीत देखाडा.

28 आपाअ प्रभु ईसु ख्रिस्ताआ मेरवानी तुमाअ आरी रोअहूं जोवे. आमेन.