सलाम
1 पौलुस, सिल्वानुस आन तिमथ्याअहें रोते— थेस्सलनीइ मंडड़ीइ नावसे, जे देव बाह्हाआ आन प्रभु ईसु ख्रिस्ता मेहें होये:
देवोअ मेरवानी आन होक तुमुहूं जोड़तू रोये.
थेस्सलनी वालाआं जिवन आन विश्वास
2 आमू कायम आमाअ प्रार्थना मेहें तुमुहूं ईत कोअताहा आन हादाफल तुमा आखाआ बाप्तिमेहें देवोअ धन्यवाद कोअताहा. 3 आन आपाआ देव आन आब्हाआ सामने तुमाआं विश्वासो वाईं कोअल्या कामोंहों आन मेरे वाईं कोअल्यी मेहेंनतोहो, आन आमाअ प्रभु ईसु ख्रिस्तामेहें आशा वाईं सहन कोइलाअ सेक्तीही कायम ओर कोअताहा. 4 आमाआं पाव्हीइला आमुहूं मुंदू होय, के देव तुमापोअ मेर कोअहे, आन तिये तुमुहूं तियाआ खाजगी माअहें ओवे तेहें काजे निवड़्येहे. 5 काहाके आमाअ हाजी बातमी तुमाअ जागे निस्ती शब्दामेहें एतीज नाहां पोती, पोन सेक्ती वाईं, पवित्र आत्मा वाईं आन पुरा भरिवसा वाअहीं पोतीही, ओं तुमुहूं मुंदू होय के आमू जाहां तुमाअ जागे ओता, ताहां तुमाअ फायदाअ काजे केहेलोहो जिवन जिवताते. 6 तुमू वोडी आफतोमेहें ओते, तेबी पवित्र आत्मा वाअहीं आपल्यी खुसी वाईं वसन मानित कोइत आमाआं होसे आन प्रभुउ होसे साले वोल्ये. 7 तिहीं वाईं तुमू मकिदुनिया आन अखायाआ विश्वास्याआं काजे एक नमुनू बोणीत गोये. 8 काहाके तुमाअ जागे रोत प्रभुउ वसनोअ पुकारु फुटू, तो निस्तु मकिदुनिया आन अखाया एतुज नाहां, पोन देवोपोर्युउ तुमाअ विश्वास आखी जागे पोसऱ्यु, ताहां आमुहूं किज कोअलाअ गरज नाहां.
9 काहाके तुमाअ जागे आमाआं आविइलोअ कि कोइत ओवो, आन तुमू जिवता आन खोरा देवोअ सेवा कोइलोअ काजे कि कोइत मुर्तीइहें रोत देवोअहें फिर्ये; तो तें सोताहाज आमाआं बाप्तिमेहें कोतेहे. 10 आन तियाआ बेटाह्हाअ होरगाम रोत आविइलाअ वाट जोवते रोवा, तो तियाआ बेटुह्हू ईसु होय, जो मोल्याम रोत जिवीत उठ्यू आन जो देवोअ आवनारी खोते रोत वासाड़ेहे.