1थेस्सलनी 2

थेस्सलनी मेहें पौलुसोअ काम

1 माआं पाव्हीइला, आमाअ तुमाअ जागे आविलोअ वाया ने ओवो ओ तुमुहूं बी मुंदू होय. 2 पोन तुमू सोताहा जांअतेहे के पेल फिलीप्पी मेहें दुख वेठीत आन अपमान खेटीत बी आमू देवोअ हाजी बातमी जाअखा विरोदो मेहें तुमुहूं उनाड़ीत सेको एहेलुहू आपाअ देवे आमुहूं धिर आप्यू. 3 काहाके आमाअ कोअलोअ सुकीइ, नेत खाराब उद्देश, नेते माहुंहूं ठोगीइलाआ कायनाहां; 4 पोन जेहें कोइत देवे आमुहूं हाजी बातमी परसार कोइलोअ काजेहे फारकीत पसन कोअयाहा, तिहीं वाईं ते आमू कोत आपताहा, आन यामेहें आमू माअहुंहूं जोवे तेहलोहो नाहां, पोन जो आमाआं मोनोहो फारकेहे तिया देवोहो जोवे तेहलोहो आमू गोगताहा.

5 तुमुहूं वारुहूं मुंदू होय के आमू ने केदिहीं गुल्यी-गुल्यी गोठी कोअताते, आन ने लाभोअ गोठी कोअताते, देव साक्शी होय; 6 आमू माअहूं पोअ रोत कोड्लूज मान सन्मान लेअलाआ कोशित ने कोअयी, ने तुमाप रोत, आन ने बिहीरा कोडा पोअ रोत. 7 आमू ख्रिस्ताआ प्रेशित होय कोत तुमापोअ ओं होदताते, पोन जेहलीही एक आयही तियाआ पोर्‍याहा दुध पिवाड़ीत कोइत पालन पोशण कोअहे, तेहलाहा आमू तुमाअरी नम्रता वाअहीं रोया. 8 काहाके तुमाआं बाप्तिम आमाआं मेरेए वाखरी देवोअहीं रोत जोड़ल्यी हाजी बातमी आपीइलोअ तेतोज नाहां, पोन सोताआ जिवन बी आमू तुमाअ काजे आपीइलाआ ईतवीइताहा, काहाके तुमू आमाअ मेराले ओत गोयेहे.

9 माअ पाव्हीइला, आमू केहेलिही कठीण मेहेंनत आन तारास कोअयू, तो तुमू पाक्के ओर मिका; तुमापोअ वोजू ने आवुहूं जोवे कोत आमू दिहीन रात काम कोअता जात देवोअ हाजी बातमीइं परसार कोअयू.

10 तुमा विश्वासी माअहों मेहें आमाआं वेवारो केहेलोह सोको आन धर्मी आन निर्दुस रोयो, तो तुमू सोताहा आमाआं साक्शी होय, आन देव बी साक्शी होय. 11 तुमुहूं मुंदू होय के, जेहें कोइत बाह्हू तियाआ पोर्‍यांअरी वागेहे, तेहेंज कोइत आमू बी तुमाअरी वाग्या. 12 आमू तुमुहूं प्रोत्साहीत कोअये, आमू तुमुहूं होमजाड़्ये, आन तुमुहूं तारबंद विनंती कोअता रोया, के एहेलोहो जिवन जिवा, जों देवोहो गोमेहें, जिये तुमुहूं तियाआ सोताआ राजोअ आन महिमाअ भागीदार ओवीइलाआ काजे हाद्येहे.

13 तियाहा काजे आमू बी कायम देवोअ धन्यवाद कोअताहा, के जेहेलाम आमाअ जागे रोत देवोअ वसन तुमाअ जागे पोतो, तेहेलाम तुमू तों माअहुंउं नाहां, पोन देवोअ कोत मानित लेदो आन खोरीज ओं एहेलोज होय; काहाके देव तुमा विश्वास कोअनारा मेहें काम कोअहे. 14 माअ पाव्हीइला, तेज आखी गोठी तुमाअरी ओयी, जे यहुदीया मेहें देवोअ तियी मंडड़ीइ आरी ओयीते, जे ख्रिस्त ईसु मेहें होय, तुमू तुमाअ हेंगात्यांअरी तेहेलुहूज तारास वेठ्युहू, जेहलुहू तियां यहुदीइ आथे वेठ्युतो, 15 जियां प्रभु ईसुहू आन भविश्यवक्ताहां बी माईंत टाक्या, आन आमुहूं बी तारास देदू, देव तियां वाईं खुस कायनाहां, आन तें आखा माअहुंउं विरोद कोअतेहे, 16 बिगर यहुदी माहुंहूं सुटका मिलुहूं जोवे कोत जो संदेश आमू आपताहा तियाहा ते रुकतेहे, यी गोठी मेहें तें सादाज तियांआं पापोअ मापलो पोअया कोअतेहे, तियां पोअ देवोहो पुरी खोत लागीही.

पौलुसोअ फाशोअ तियांहां मिलीइलाअ इश्शा

17 माआं पाव्हीइला, जेहेलाम आमू थोड़ा वेलोअ काजे, तुमाअरी रोत सेटे ओत गोयाते, तेबी मोनो वाअहीं नाहां, पोन डिलो वाअहीं, ताहां आमू वोडी आशा वाअहीं तुमाअ सोब पालीइलाअ जाअखीलिही कोशित कोअयी. 18 तिहीं वाईं आमू तुमाअ जागे आविइलाअ इश्शा कोअयी; आंय पौलुसे एक वाआ नाहां ते बेन वाआ इश्शा कोअयी, पोन सैताने आमुहूं रुक्या. 19 काहाके आपाआ प्रभु ईसुउ सामने, तियाआ आविइलाआ टायमोहों आमाअ आशा, आमाअ खुसी आन आमाअ इलामोअ टोपू जियापोअ आमू वोडाय कोअताहा तो की होय? तें तुमूज होय ना? 20 खोरीज आमाअ वोडाय आन खुसी तुमूज होय.