1 तियाहा काजे पाव्हीइला, आमू तुमुहूं रावणी कोअताहा आन तुमुहूं प्रभु ईसु मेहें समजाड़ताहा, के जेहें कोइत तुमू आमाअरी हाजे साल्ये आन देवोहो खुस कोइलाअ सिकाअयेहे, आन जेहें कोइत तुमू सालतेहे बी, तेहेंज कोइत तुमू वादारेन वादार वादते जावा. 2 काहाके तुमुहूं मुंदू होय के प्रभु ईसुउ आधिकारो वाअहीं आमू तुमुहूं काअली सुसना आप्यीही. 3 काहाके देवोअ इश्शा ए होय के, तुमू सोके बोणे: आन एकसोट्येज सिनालो कोइलो रोत सुटीत जावा, 4 आन तुमा मेर्‍योअ हारेक जोओं सोकायी मेहें आन मानपानो वाअहीं सोताआ लाडीही ताबाम लेअलोअ जाईंत लेअहूं जोवे. 5 आन ओं काम लालसायी वाईं नाहां, आन जें देवोहो नाहां ओलखीइते एहेला माअहोंअ होस बी ने कोइलो.

6 यीं गोठी मेहें कोडोज विश्वासी पायहोहो ने ठोगुहूं जोवे, आन कोडोज तियापोअ दाबाव ने टाकुहूं जोवे, काहाके एहेला आखाआ वोतीइ प्रभु डोंड आपनारु होये; जेहें कोइत आमू पेल बी तुमुहूं कोताते आन समजाड़ताते. 7 काहाके देवे आपुहूं एठे ओवे तेहें नाहां, पोन सोके ओवे तेहें काजे हाद्येहे. 8 तियाहा काजे जो या शिक्शणोहों नाकारेहे, तो एखा माहुंहूं नाहां नाकारतो, पोन तिया देवोहो जो तुमुहूं पवित्र आत्मा आपेहे, तियाहा नाकारेहे.

9 विश्वासी पाव्हीइलाआ मेरेए बाप्तिमेहें ओं गरज नाहां, के आंय तुमाअ कोअते कि तेबी लेखो, काहाके एक बिहीरा पोअ मेर कोइलाअ तुमू सोताहा देवो पोअ रोत सिकाअयेहे; 10 आन हुदाअलीज पुरा मकिदुनियाआ आखा पाव्हीइलांअरी एहलोहो तुमू कोअतेहे जे, पोन पाव्हीइला, आमू तुमुहूं विनंती कोअताहा के फाश्येए बी वादते जावा. 11 आन जेहें कोइत आमू तुमुहूं कोत आप्योहो, तेहेंज कोइत ठावके रोअलाआ आन जिव जिवोअ काम-काज कोइला आन जिव जिवोअ आथो वाअहीं कामाविलाआ कोशित कोआ; 12 एहें कोइत तुमू जे माअहें विश्वास नाहां कोअते तियां पोअ रोत तुमुहूं मानपान जोड़ीत सेके, आन तुमुहूं काअलीज वस्तुउ कमी ने ओवुहूं जोवे.

13 आमाअ पाव्हीइला, आमाअ ए इश्शा होय के तुमू तियांआं बाप्तिमेहें जें हुवतेहे, ओजाण्ये ने जोवे; मोन्ज्ये बिहीराअ होस विखा ने कोइलो जियांहां आशा कायनाहां. 14 काहाके जर आपू ओ विश्वास कोअतेहे के ईसु मोयू आन जिवीत बी उठ्यू, ताहां ईसु मेहें जें मोअतेहे, तियांहां बी देव तियाअरी लेत आवे.

15 आन आमू जो तुमुहूं प्रभुउ वसनो वाअहीं ओं कोताहा, के आपू जे जिवते होय आन प्रभुउ आविइलाआ दिहे जाआं जिवते रोहूं, ते जे मोयेहे तियां रोत आगाड़ी केदिहींज ने जात सेकहूं. 16 काहाके प्रभु सोताहाज होरगाम रोत उतरे; तियी वेले पोअ वोडू आवाज, आन मुख्य देवदुतोअ शब्दाआ आवाज होंबलाय, आन देवोअ तुरी फुकाय; आन ख्रिस्तामेहें जे मोयेहे, तें पेल जिवित उठे. 17 तेहेलाम आपू जे जिवते आन वासाइत रोहूं, तेहलेज तियाअरी वादला पोअ हावामेहें प्रभुहू मिलीइलोअ काजे विसाइत जाहूं. 18 आखरी पोअ यां शब्दा वाअहीं एकान बिहीराहा समजाडते रोवा.