1 आंय ओमे कोहो के, वारिस जाअहूं जाआं हानू पोर्‍यू होय, भले तो आखी वस्तुउ मालिख बी होय, तेबी तियामेहें आन पावरोमेहें किज फरक कायनाहां. 2 पोन आब्हाआ ठरवीइल्यी मुदतेपोअ जाआं तो मास्तर आन पावरोअ ताबाम रोहे. 3 तेहेंज कोइत आपू बी जेहेलाम हाने ओते, तेहेलाम दुन्याहां सालाड़नारा आत्माआं ताबाम बांदात रोयेते. 4 पोन जेहेलाम वेल पुरी ओवी, तेहेलाम देवे तियाआ बेटाह्हाहा मोकल्यू. तिये एकी बायीइ पेटे जल्म लेदो आन यहुदी कायदाआ पुरमाणे जिवन जिवयू. 5 काहाके जें कायदाआ बंधनोम जिवतेहे तियांहां तो कायदाआ बंधनोम रोत सोड़वीत सेके, मोन्ज्ये आपुहूं देवोअ पोऱ्ये बोणिइलोअ आधिकार जोड़ुहूं जोवे.

6 आन तुमू पोऱ्ये होय कोत देवे, "बा, ए बा" कोत हाद कोइलोअ तियाआ बेटाह्हाआ आत्मा आपाआ दिलोमेहें मोकल्युहू. 7 तिहीं वाईं ओमे तु पावर नाहां, पोन पोर्‍यू होय; आन पोर्‍यू होय, ताहां देवो वाअहीं वारिस बी ओवू.

8 पेल ताम तुमू देवोहो ने ओलखीइतेते, आन तिहीं वाईं जे सोभावो वाअहीं देव नाहां एहेलाआं सेवा साकरी कोअतेते. 9 पोन ओमे जें तुमू देवोहो ओलखीइतेहें, आंय ते कोहो, देवे तुमुहूं ओलख्येहे, ताहां तियी रुढ़ीखुड़्यी विणकाम्यी वेगीइ-शिक्शणोअ वोल काहा जातेहे? आन काहा तुमू फाशेए तिहींम बांदाअहूं होदतेहे? 10 तुमू दिही, मोयना, ठरिवल्यी वेल आन वोऱ्ह्योंहों मानतेहें. 11 तुमाआं कोअते कोअल्यी माआं मेहेंनत वाया जाय एहेलिही माहूं ते तुमाआं बाप्तिम सिंता लागेहे!

12 माआं पाव्हीइला, आंय तुमुहूं रावणी कोअहो, तुमू माआं होस बोणा, काहाके आंय बी तुमाआं होस बोण्युतो. तुमू माआं किज नाहां बिगाड़्यो. 13 पोन तुमुहूं मुंदूज होये के, पेल-पेल आंय तुमुहूं हाजी बातमी कोताप्यी काहाके तेहेलाम आंय बिमार ओतू. 14 आन माआं शारीरिक कमजोरीइ वोजेसे तुमाआं परिक्शा ओवत्ली तेहेलाम तुमू माआं सीस नाहां कोअयी; पोन माहूं देवदुत आन ख्रिस्ताआ होस स्विकार कोअयू. 15 तेहेलाम तुमू जास्ती खुस ओते आन ओमे खोते? आंय सोताहा साक्शी होय, के जर ओत सेकतो, ताहां तुमू सोताआ डोआ बी माहूं काडीत आपी देते. 16 ताहां का आंय खोरो गोग्यू कोत तुमाआं दुस्मोन ओवू के?

17 ते तुमुहूं दोस्ती बोणावुहूं होदताहा, पोन हाजाआ काजे नाहां; तुमू तियांअरी दोस्ती कोइत लेअहूं जोवे काजे ते तुमुहूं मा रोत नारा कोअहूं होदताहा. 18 पोन ओमे, ओं बी हाजोज होय के, जेहेलाम आंय तुमाअरी रोहो तेहेलाम एतोज नाहां, पोन हाजी गोठीइ काजे कायम दोस्ती बोणाविलाआ कोशित कोअहूं जोवे. 19 ए माआं पोर्‍यां, जाअहूं जाआं तुमामेहें ख्रिस्ताआ रुप ने बोणे, ताअहूं जाआं आंय तुमाआं काजे फाशुउ पोटावाली बायीइ होसर्‍यीइ पिड़ा वेठोहो. 20 इश्शा ते ओवेहे के ओमे तुमाआं जागे आवित कोइत बिहीरीज बाती वाअहीं गोगो, काहाके तुमाआं बाप्तिमेहें माहूं जास्ती फिकर होय!

21 तुमू जे कायदाआ ताबाम रोअलाअ ईतवीइतेहे, पोन माहूं कोवा, कायदु की कोहे तों तुमू नाहां उनाअते के? 22 तिहीं लेख्योहो के, अब्राहामोओं बेन पोर्‍या ओवा; एक कांय साकऱ्यीइ आन एक खाजगी बोईंइ. 23 पोन जो साकऱ्यीइ पेटे उबज्यु, तो शरीर सोभावो वाईं उबज्यु; आन जो तियाआ लाडी वाअहीं ओवू, तो आथवसनोअ परमाणे उबज्यु. 24 यीं गोठीही काईंवाईं समजीत सेकतेहे: ए बेनु बोईं बेन करार समजीत ल्या. एक ताम सिनाय डोगोअ जिहीं गुलाम उब्जीइतेहे; आन ते हाजिरा होय. 25 आन हाजिरा अरबोअ सिनाय डोगोअ होस समजीत ल्या, आन ओमेएं येरुसालेम तियाआ सारकोहो होय, काहाके तों आन तियाआ पोर्‍येनेहें गुलामीमेहेंज होय. 26 पोन उफाअटो येरुसालेम मोकलो होय, आन ते आपाआ याह्ही होय. 27 काहाके वसनोम लेख्योहो,

"ए वांज्यी बाय, तू पोऱ्ये नाहां जोणती तेबी खुसीम रो;

ताहूं वेणे नाहां आवते, तू आखे काहालेज जय जयकार कोअ;

काहाके माट्योवाली बोईंइ पोर्‍यां रोत

सोड़ली बोईंइ पोर्‍ये जाअखे होय."

28 माआं पाव्हीइला, ओमे आपू इसहाकोअ होस आथवसनोअ पोर्‍ये होय. 29 तियी वेले जेहें कोइत शरीरोअ अनुसार उब्जीइल्ये पोऱ्ये आत्माआं अनुसार उब्जीइल्या पोऱ्याहा तारास देतुतो, तेहेंज कोइत ओमे बी ओवेहे. 30 पोन वसन कि कोहें? "साकऱ्यीही आन तियीइ पोर्‍याहानेहें काडी दे, काहाके साकऱ्यीइ पोर्‍यू खाजगी बोईंइं पोर्‍याअरी वारीस ने ओवनारु." 31 तियाहा कोत, पाव्हीइला, आपू साकऱ्यीइ पोऱ्ये नाहां, पोन खाजगी बोईंइ पोऱ्ये होये.