योनू देवोअ आदेश मानत्लू
1 ताहां यहोवा देव दुसरी वारी योनाअरी गोग्यू: 2 "उठ आन तिया वोडा निनवे होयरोम जा, आन जे गोठ आंय ताहूं कोहीं, ते तु तिहीं पुकारु कोअजी." 3 ताहां योना यहोवा देवोअ कोल्याआ पुरमाणे निनवे गोयू. निनवे जास्ती वोडो होयर ओतो. तों पुरो होयर फिरुहूं तिन दिही लागीत जाताते. 4 योनू एक दिही पोइत होयरोम सालतू जात एहें कोइत पुकारु कोऊ वोल्यू, "आज कोइत सालीही दिही रोयाहा, तिहीं रोत निनवे होयर आरवात जाय!"
5 ताहां निनवेवाला माअहूं देवोअ गोठीपोअ विश्वास कोअयू; आन उपास कोइलोअ ठरव्यो आन हाने रोत ते वोडे जाआं आखाज गोंठो फांगीत उपास तोअयु.
6 ताहां ए बातमी निनवेए राजाआ कानोपोअ पोड़्यी; आन तो बी राजगादीपोअ रोत उठीत कोइत तियाआ राज-आंगड़े काडीत मेकी देदे, आन गोंठो फांगीत लेदोन खाओंम बोहीत गोयू. 7 निनवेए राजे तियाआ मोंत्र्योंअरी गोठी कोइत ठरवी देदोन पुकारु कोई देदू, के "कोडो किज ने खाअहूं जोवे, माअहें ने के, मेडे ने के, डोगरेन बोकड़े ने के, बिहीरे कोड्लेज जनवारे ने. आन पाईं बी ने पिअहूं जोवे. 8 माअहें आन जनवारे आखे गोंठो फांगुहूं जोवे, आन तें देवोहो रोड़ी रोड़ीइ प्रार्थना कोअहूं जोवे; आन सोताआ खाराब कामोम रोत मोन फिरवुहूं जोवे, आन तियांआं भान्गड़्यीइ उस्ती माफी मागुहूं जोवे. 9 ओत सेकेहे, देव दया कोए आन तियाआ खिज उलवीत लेय, आन तियाआ खोत कमी कोइत लेय आन आपू आरवाइलो रोत वासात जाहूं."
10 तें माअहें तियांआं खाराब वाट सोड़त्ले देखीत देवे तियाआ विसार बोदली देदू, आन तियांहां आरवीइलोअ ठरव्योतो पोन तियांहां ने आरव्ये.