योना 4

योनाआ खोत आन देवोअ दया

1 ए गोठ योनाहा जास्ती खाराब लागी, आन तियाहा जास्ती खोत लागी. 2 ताहां तिये एहें कोत कोइत यहोवा देवोहो प्रार्थना कोअयी, "यहोवा देवा, जाहां आंय माआ देसोमेहें ओतु तेहेलाजमेहें ए गोठ ने कोयोतो के, तु तेहेंज कोअनारु होय? तियाहाज काजे तोम आंय ताआ आदेश टाली देत उतवालेहे तार्शीशोअ वोग नाहींत गोयुतो; काहाके माहूं मुंदू ओतू, के तु मेरवानी कोअनारु आन दयालू देव होय, आन बागे राखीत खोत कोअनारु मेरालू देव होय, अड़सन पाड़ीत ताहूं खुसी नाहां ओवती एहलुहू तु देव होय. 3 ताहां देवा, ओमे तु माहूं माइत ले; काहाके आंय जिवतू रोंव तेतोहो जी मोइत गोल्ये हाजो पुरड़े."

4 यहोवा देवे कोयो, "ताहूं जे खोत लागीही ए ठिक होय के?"

5 यी गोठीवाअहीं योनू तिया होयरोम रोत निहींत उगतामाआं वोग सावलाआ काजे मालू बोणायू, आन तियाआ थुड़ते बोहीत होयरोअ की ओवेहे तों ठावकुज बोहीत पालु वोल्यू. 6 तेहेलाम यहोवा देवे एक ताबुड़ पोहाअनारो वेलो उगाड़्यो आन तिया मालापोअ सावलू ओत जाय तेहें काजे ताबुड़ वोडो कोई देदो. तिया वेलाहा देखीत योनाहा जास्ती खुसी ओवी. 7 वेगीइ जेहेलाम हुजो वोल्यो, ताहां देवे तिया वेलाहा कात्री देय तेहें एका किड़ाहा मोकल्यू, तिये वेलाहा कात्री देदो आन तो वेलो उगात गोयो. 8 तिहीं रोत दिही उगू तेहेलाम देवे उगताअहें रोत झांव सालू कोई देदी, आन योनाअ मुन्कापोअ एहलोहो तोपो वोल्यो, के तो जाखलाउ वोल्यू आन ताहरुउ देवोहो कोनु वोल्यू, "आंय इंहीं जिवतू रोंव, तेतोहो जी मोइत गोल्ये पुरड़्यो."

9 ताहां देवे योनाहा कोयो, "तिया वेलाआ वाखरी ताहूं खोत लागी, ओं ठिक होय के?" तिये कोयो, "होव, ठिक होय, इंहीं वाअहीं माहूं मोत बी आवित जाय तेबी साले."

10 ताहां यहोवा देवे कोयो, "जिया वेलाआ काजे तुमे वाहीं मेहेंनत ने कोअयी, ने तियाहा वोडो कोअयो. तों एकीज रातीम वोडो ओवो आन बिहीरी रातीम आरवात गोयो, तियापोअ ताहूं एती किव आवेहे; 11 ताहां ओं एतो वोडो निनवे होयर होय, जिहींम एक लाख विही हाजार माअहें होय. जियांहां आगो-फाशोअ किज नाहां मुंदू, आन वारुज पाल्ल्ये जनवारे बी तिहींम रोतेहे. ताहां केहें आंय तियांपोअ किव ने कोओ के?"