1 यहोवा देवे मोरेशेत होयरोमेहें रोनारा मिखाहा यहुदाआ मुलखोअ राजा योताम, आहाज आन हिजकिया यांआं राज कोइलाअ दिहोमेहें तियाआ संदेश आप्यु, मिखे शोमरोन आन येरुसालेमोअ बाप्तिमेहें ओं दर्शन पाल्यो:✝

2 ओ आखा देसोअ माअहों, तुमू आखे उनाआ;

ए धरती, तु आन जें तामेहें होय तें आखे दिहान लागाड़ा!

प्रभु यहोवा तुमाआ विरुद्दाम,

आन प्रभु तियाआ सोका मंदिरोमेहें रोत तुमाआ बाप्तिम साक्शी आपे.

3 पाला, यहोवा देव तियाआ पवित्र जागाम रोत बारथे निहेंहे,

तो निसे आवे, आन तो धरतीपोऱ्याआ उसा डोगोपोअ साले.

4 जेहेंकोइत मेणबत्ती आगीवाअहीं ओगलीत जाहे,

तेहेंकोइत तियाआ गुडाआ थुड़ीइ डोगोअ ओगलीत जाय,

आन जेहेलोहो काटोपोअ रोत पाअयोंअ खोब्दू निसे पोड़ेहे,

तेहें कोइत काट फाश्याआ बी वादार उंडा पोड़े.

5 ओं आखो याकोबोअ पाप आन इस्राएलोअ घराणाआ पापोअ उस्ती ओवेहे. याकोबोअ गुनू की होय? केहें शोमरोन नाहां के? यहुदाआ उसा जागा की होय? केहें येरुसालेम नाहां के? 6 तियाहा काजे यहोवा देव कोहे, "आंय शोमरोनोहों रानोमेऱ्याआ टिगोअ होस बोणावी देहीं; एहेलुहू जागु जिहीं माअहें दाराक्शाआ मोलू लागाड़े. आंय तियाआ डोणे बारीमेहें लुड़वी देहीं, आन तियाआ पायू उफड़ीत टाकिहीं. 7 तियाआ देवताआ मुर्तीइ पुकरान पुकरा कोई देही; आन जों किबी तिये सिनालो कोइत कामावयोहो तों आगीमेहें नावासट आरवी देहीं. आंय तियाआ आखी मुर्तीही सुउवीत टाकीहीं; काहाके तिये सिनालाआ कामायी वाअहीं तियांहां हाटव्येते, तियाहा काजे रांडीइ कामायीइ होस ते बी आरवाइत जाय."

8 भविश्यवक्ते कोयो, "आंय यी आफतेए काजे विखु कोअहीं; आंय रोड़हीं. आंय बिगर खाहाड़ाआ आन उगड़ाअलुज फिऱ्या कोअहीं; आंय कोल्याआ होस आअड़ीहीं, आन राजकुकड़ाआ होस रोड़हीं. 9 शोमरोनोअ दुख केदिहींज ने हुदरे एहेलोहो होय; तियाआ आफत यहुदापोअ बी आवीत पोड़्यी, एतीज नाहां पोन ते माआं पाव्हीइलाअ पोअ आवीत कोइत येरुसालेमोअ गेटोअ जागे जाआं पोतीत गोयीही."

10 गत होयरोमेहें तियाआ माग मा काडहा, तिहीं तुमू रोड़हा मा; पोन बेथ-आप्रामेहें* तुलामेहें ओंअडा. 11 ओ शापीरोवाली, उगड़ाअली आन विणलाज्यी तुमू निहींत जावा, इंहीं मा रुकाअहा. ओ सानानोवाली गावोंम रोत बारथे नाहां निहींयी; बेथसेलोअ विखु तुमुहूं तिहीं उबू ने रोअहूं देय. 12 मारोतोवाली तोम मदतेए वाट जोवी-जोवीइ नाराज गोयीही, काहाके यहोवा देवोअहें रोत येरुसालेमोअ गेटोअ जागे जाआं आफत आवीत पोतीही. 13 ओ लाकीशोवाली जोरे गुगदीइनारा कोड़ा गाडामेहें जुपा, आन जावा; काहाके सियोनोवाली* ताजपोअ रोत पाप कोइलोअ सिकाअयेहे, ताजमेहें इस्राएलवालाआ गुनाआं मिंजो होय. 14 तिहीं वाअहीं तु गतोअ मोरेशेतोहो दान आपीत कोइत सेटे कोइ देहीं; अकजीब* राजवंश ओं इस्राएली राजहांहां दोगु देय.

15 ओ मारीशवाली, आंय तुमापोअ एक आधिकारी ठरवीहीं, आन इस्राएलोअ पुडाऱ्योहों अदुल्लामोअ कुपामेहें आवुहूं पोड़े. 16 तुमाआ मेराला पोऱ्याआ काजे दुखोमेहें तियाआ मुन्काआ सिंग्ये कातरावा आन डिगरावाआ होस सोताआ टालगी कोइत ल्या, काहाके तुमाआ पोऱ्ये तुमाआ जागे रोत गुलाम बोणित कोइत जाते रोय.