1 जें पोलांगीपोअ लोट-लोटे खाराब गोठी इतव्या कोअतेहे, आन खाराब कामोअ इश्शा कोअतेहे, आन तें हुजेहे तेहेलाम तियांआं योजनाहां पुरी बी कोअतेहे, तियांआं केतिही वाजे! काहाके एहेलोहो कोइलाआ सेक्ती तियांआं आथोम होय. 2 तें बिहीराआ खेतोअ लालस कोअतेहे, आन तियांहां बुउसीत लेतेहे; तें बिहीराआ कोओअ लालस कोअतेहे, आन तें तियांहां बी बुउसीत लेतेहे. तें आहने रोनारा आन तियांआं परिवारोहो दोमतेहे, आन तें बिहीरा माअहुंउं आन तियाआ डायहांआं आथऱ्यीइ मालमिलकत आन तियां माअहुंहूं नेहें दोमतेहे.

3 "तिहीं वाअहीं यहोवा देव एहें कोहे: आंय यां दोमारा माअहोंअ विरुद्दाम आफतेए योजना बोणावोहो. तुमू यी योजनाआ निसे रोत तुमाआं बोस काडीत ने सेकहा, काहाके ते वेलुज खाराब रोनारी. 4 तेहेलाम तुमावाले माअहें तुमाआं नावे लेत साती ठोकी ठोकीइ विखु कोए:

आमू बार्बाद ओत गोये!

प्रभुउ माअहुंउं डायहांअ आथऱ्युउ जागु बिहीराअ ताबामेहें जाहे,

तो तियाहा आमाआं आथोम रोत बुउसेहे. आपुहूं दोगू देनाराआ आथोमेहें आपाआ जागु वाटी आपी देहे."

5 यहोवाअ मंडड़ीमेहें सिट्टी टाकित कोइत आन दोअड़ी वाअहीं मापित कोइत जागाहा वाटनारो कोडोज ने रोय आन तुमुहूं जागाआ एक तुकड़ू बी ने जोड़े.

6 "तियांआं भविश्यवक्ता कोताहा, ‘भविश्यवाणी मा कोअहा, यीं गोठीइ बाप्तिम भविश्यवाणी मा कोअहा, काहाके आमुहूं कोड्लुज अपमान वेठुहूं ने पोड़े.’ 7 ओ याकोबोअ घराणा, केहें माहुंउं माहूं ओं प्रश्न फुसीत सेकेहे? ‘केहें यहोवा देवोअ आत्मा धिर टाकित बोठुहू के? केहें एं तियाआ कामे होय के? माआं वसनोवाअहीं जों सिदो सालेहे तियाआ हाजो नाहां ओवतो के?’"

8 "पोन तुमू दुस्मोनोअ होस माआं माअहुंउं विरुद्दाम उबा रोया. जें लड़ायीइ इश्शा बी नाहां कोअते, जें तुमापोअ विश्वास कोइत ठावकेज वाटे सालतेहे, तियां भोला भाला माअहोंअ डिलोपोऱ्येए आंगड़े काडीत लेताहा. 9 माआं माअहुंउं बोईंहीं तुमू होकेहे रोअलाअ कोअमेहें रोत काडी देताहा, आन तियींइं पोऱ्याहां मी आपल्यी हाजाम हाजी वस्तु एकसोट्यीज बुउसीत लेताहा. 10 उठा, आन निहींत जावा! काहाके ओ तुमाआं आरामोअ जागु कायनाहां; यी एठायीइ वाखरी तुमुहूं एकसोट्येज आरवी देय.

11 "जर एखु रिकामी गोठी कोअतो आन एहें तेहें ठोगतो फिरेहे, आन एहें कोहे, ‘आंय तुमुहूं कायम दाराक्शाआ रोहोअ आन होराअ बाप्तिमेहें सिकाड़ोहो,’ ताहां तोज यां माअहुंउं भविश्यवक्तू ठरेहे.

12 "पोन प्रभु कोहे: आंय हुदाअलीज तुमू आखाहा फाशेए एक्ठे कोअहीं; आंय रोल्या इस्राएलवालाहां फाशुउ एक्ठे कोअहीं; जेहेलोहो कोंडवाड़ामेहें मेडाहां, नेताहां रानोमेहें डोगरान बोकड़ाआ गोवाराहा एकीज जागे लेत रोतेहे, तेहेंज कोइत आंय तुमुहूं मिकीहीं. तुमाआं गणती हाजारेन हाजार ओवे."

13 तियांआं आगाड़ी आगाड़ी कोंडवाड़ाहा तोड़नारु गोयुहू, तियाहा काजे तें बी तियाहा तोड़तेहे, आन बाअणाम रोत सोरकीत बारथे निहींत जातेहे; तियांआं राजा तियांआं आगाड़ी आगाड़ी गोयु मोन्ज्ये यहोवा देवुज तियांआं वाट देखाड़नारु रोय.